Multimedia İnformasiya Sistemləri və Texnologiyaları Mərkəzinin Məlumatı

27 oktyabr 2006- cı il tarixdə Multimedia İnformasiya Sistemləri və Texnologiyaları Mərkəzi tərəfindən “İnformasiya azadlığının gerçəkləşməsində İnternetin rolu: mövcud vəziyyət və perspektivlər ” mövzusunda Dəyirmi Masa keçirilib. Dəyirmi Masa ACİ-Yardım Fondu tərəfindən dəstəklənən “Dövlət orqanlarının və Mədən sənayesində şəffaflıq təşəbbüsünə qoşulan neft şirkətlərinin informasiya açıqlığının monitorinqi və vətəndaşların informasiya hüququnun gerçəkləşməsinə dəstək” Layihəsi çərçivəsində həyata keçirilir.

Dəyirmi Masada Multimedia Mərkəzinin direktoru, Layihənin rəhbəri Osman Gündüzün , MEQA şirkətinin meneceri Qabil Qasımovun və Layihənin experti Azər Həsrətin mövzu ətrafında təqdimatları olub. Dəyirmi Masada həmçinin Dövlət orqanlarının və neft şirkətlərinin internet resurslarının monitorinqi əsasında Multimedia Mərkəzi tərəfindən hazırlanan növbəti növbəti Reytinq Cədvəli açıqlanıb.

Dəyirmi Masada Neftçilərin hüquqlarını Müdafiə Komitəsinin rəhbəri Mirvari Qəhrəmanlı, RİTN-nin şöbə müdiri Əflatun Məmmədov, Siyasi İnnovasiyalar və Texnologiyalar Mərkəzinin sədri Mübariz Əhmədoğlu, Konstitusiya Fondunun rəhbəri Əliməmməd Nuriyev, Milli Məclis aparatı İnformasiya Texnologiyaları şöbəsinin əməkdaşı Yaşar Əməşov, Media Hüquqları İnstitutunun direktoru Rəşid Hacılı, Vətəndaş Cəmiyyətinin İnkişafı Assosiasiyasının nümayəndəsi Vüqar Tofiqli, Himayədar Humanitar Təşkilatının nümayəndəsi Şəhla xanım Abusəttar, İnformasiya Texnologiyaları İnstitutunun əməkdaşı Gülnarə Həbibəyova, RİTN-nin sektor müdiri İsfəndiyar Əliyev , İnFotex qurumunun nümayəndəsi Firudin Əhmədov və digərləri çıxış ediblər.

Ictimai informasiyaların internet resursları vasitəsilə yayılması, dövlət internet resurslarının keyfiyyəti, Qanunla açıqlanması məcburi olan informasiyaların İnternetdə yerləşdirilməsi vəziyyəti ətrafında ciddi müzakirələr aparılıb. Dəyirmi Masada İnformasiya əldə edilməsi haqqında Qanunun icrasına nəzarət məqsədilə yaradılmalı olan Informasiya müvəkkili institutunun tezliklə formalaşdırılması məqsədilə Prezidentə Müraciət etmək qərara alınıb. Müzakirələrdə dövlət qurumlarının və neft şirkətlərinin İnternet resurslarının təkmilləşdirilməsi, dövlət büdcəsindən bu istiqamətdə məqsədli vəsaitlərin ayrılması, dövlət internet resurslarının müntəzəm olaraq monitorinqinin keçirilməsinin və dövlətin informasiya siyasətinin daha çevik və şəffaf qurulmasının vacibliyi istiqamətində təkliflər irəli sürülüb.

Dəyirmi Masada hökumət qurumlarının nümayəndələri, müstəqil ekspertlər, özəl və ictimai sektorun təmsilçiləri iştirak edib.

Multimedia Mərkəzi

Tel: 492 44 44
www.cit.az
www.informasiya.org