Ekologiya və Təbii Sərvətlər Nazirliyinin www.eco.gov.az domen adlı İnternet saytının monitorinqinin yekunu /İCMAL/

Azərbaycan Respublikası Ekologiya və Təbii Sərvətlər Nazirliyinin www.eco.gov.az domen adlı İnternet saytı, maraqlı məlumatların bolluğu ilə yaddaqalan saytlardandır. Peşəsindən, millətindən, dilindən, dinindən asılı olmayaraq Azərbaycan Respublikasında yaşayan hər bir insanı ilk növbədə yaşadığı ölkənin ekoloji vəziyyəti maraqlandırır. Məhz 9 iqlim qurşağında yerləşən, yeraltı və yerüstü təbii sərvətlərlə bol olan, Xəzər dənizi ilə əhatə olunan ölkəmizin gözəl təbii relyefi, meşələri, dağları, çayları, havası və iqlimi vardır ki, bu da hər il minlərlə turistin Azərbaycana gəlməsinə yol açır. Bu baxımdan, Ekologiya və Təbii Sərvətlər Nazirliyinin saytında yuxarıda adları sadalanan təbii sərvələr barədə geniş və dolğun bilgilər almaq mümkündür. Bir ziyarətçi kimi saytdan istədiyin ekoloji sahə ilə bağlı məlumatları, şəkilləri əldə etmək mümkündür. Saytda bu sahəyə aid xidmət haqqında çox geniş bilgilər yer alıb. Saytın istifadəsi rahatdır. Elektron xidmətlər bölməsinin ayrıca təqdim edilməsi, qurumun tarixi, ünvanı, ünvana gəlmək üçün marşrutlar, rəhbərlik haqqında ətraflı məlumatlar, vətəndaşların qəbul günləri və qaydaları, dövlət qulluqçusunun etik davranışı, qaynar xətt, onlayn və telefon, faks əlaqələri, sosial şəbəkələrdə səhifələrinin mövcudluğu baxımından qurumun internet resursunu yüksək qiymətləndiririk. Xüsusilə də, quruma dövlət büdcəsindən ayrılan vəsait və onun icrası haqqında məlumat verilmişdir. Amma bunu  sahə işçilərinin əmək haqqı barədə demək olmur. Saytda demək olar ki, çox az bölmə boşdur: sahə işçilərinin tarif stavkası, tender və yarışmaların nəticələri ilə bağlı mübahisələrin həlli qaydaları, büdcədənkənar daxilolmalarla bağlı sahələr bura aiddir. Bundan başqa, saytda Milli Parklarımız, Dövlət Proqramları, Bülletenlər, Elanlar, Ekoloji Plakatlar, Meşələrin inkişafı, Geologiya, Sərvətlərimiz, Xəzər dənizi, Hidrometerologiya, Biomüxtəliflik və digər bölmələrdə çoxlu sayda və geniş bilgilər əldə etmək mümkündür.

Beləliklə, saytın ümumi mənzərəsi aşağıdakı kimidir:

1.         Qurum ilə bağlı qurumun tarixi, qurumun fəaliyyətini təmin edən qanunverici baza haqqında bilgilər yetərli səviyyədədir. Qurumun rəhbərliyi haqda kifayət qədər dolğun bilgi verilir. Kollegiya haqqında da eyni sözləri demək mümkündür.

2.         Ziyarətçilərin qurum ilə əlaqə saxlaması üçün qurumun yerləşdiyi ünvan, həm ümumi xarakterli, həm də ayrı-ayrı xidmət və alt bölümlərin telefon və faks nömrələri, mümkün olan bütün e-poçt ünvanları, qurumun ünvanının marşrut və sxemi haqqında bilgi verilir. Həmçinin, quruma getmək üçün müxtəlif istiqamətlərdən gələn ictimai nəqliyyat barədə də məlumatlar öz əksini tapmışdır.

3.         Qurumun strukturu barədə gərkli olan (qurumun strukturunun ümumi sxemi, aparat, struktur bölmələrinin rəhbərləri və onlarla əlaqə saxlamaq üçün imkanlar, struktur bölmələrinin dəqiq (tam) ünvanları, struktur bölmələrinin səlahiyyət çərçivələri, qurumun tabeliyindəki informasiya sistemləri) bilgilər təqdim edilmişdir.

4.         Rəhbər işçilər, onlarla əks əlaqə, əsas rəhbərin bioqrafiyası, qurumun rəhbəri ilə əks əlaqə imkanları və qurum ilə əks əlaqə üçün ümumi imkanlar təqdim edilir. Rəhbərin müavinlərinin bioqrafiyaları, struktur bölmələrinin rəhbərləri haqqında bioqrafik bilgilər, ayrı-ayrı struktur bölmələrinin rəhbərləri ilə əks əlaqə imkanları də təqdim edilən məlumatlar sırasındadır.

5.         Qurumun cari fəaliyyəti haqqında mətbuat üçün açıqlamalar; quruma aid olan informasiya, quruma aid olan hər cür başqa cari informasiya yetərli səviyyədədir. Bundan başqa, qurumdaxili əmr və qərarlar; bu cür aktların reyestri (qəbul və qüvvəyə minmə tarixi də daxil olmaqla); qurumun həyata keçirdiyi proqram və layihələr barədə də kifayət qədər bilgi göstərilir.

6.         Ümumi dövlət büdcəsinin quruma aid hissəsi və onun icrası barədə saytda məlumat yer tutur.

7.         Qurum tərəfindən təklif edilən mütləq xidmətlər, elektron formada təklif olunan xidmətlər, xidmətlərin keyfiyyət göstəriciləri, onlayn müraciət imkanı və xidmətlərdən istifadə qaydaları haqqında bilgi geniş əks etdirilir. Həmçinin, qurum tərəfindən təklif edilən əlavə xidmətlər, qaynar xətt nömrəsi mövcuddur.

8.         Dövlət qurumu və onun struktur bölmələrinə işə qəbulun hüquqi bazası və  işə qəbulun norma və qaydaları , dövlət qurumu və onun struktur bölmələrindəki mövcud boş iş yerləri haqqında elanlar və boş iş yerləri haqqında elanların arxivi barədə bilgilər təqdim edilmişdir.

9. Sahə işçilərinin əmək haqları barədə heç bir məlumata rast gəlinmir.

10.       Vətəndaşların qəbul şərtləri və qəbul günləri (saatları) barədə də ətraflı məlumatlar mövcuddur.

11.       Daha bir əks etdirilən bilgi tender və yarışmaların keçirilməsi ilə bağlıdır. Qurum tərəfindən tender və yarışmaların keçirilmə qaydaları, tenderlərin keçirilməsi ilə bağlı elanlar, tender və yarışmaların nəticələri, elanların arxivi saytda öz əksini tapmışdır. Yeganə təqdim edilməyən bilgi tender və yarışmaların nəticələri ilə bağlı mübahisələrin həlli qaydalarıdır.

12.       Qurumun cari norma- (qanun)yaratma fəaliyyəti, bütün mümkün normativ aktların layihələri (tam mətni), bu cür layihələrin müzakirəsində vətəndaşların iştirak şərtləri, qurumun norma- (qanun)yaratma fəaliyyəti ilə bağlı arxiv haqqında bilgilər də saytda öz əksini tapmışdır.

13.       Saytın texniki imkanları yaxşı dəyərləndirilir. Ancaq abunə imkanı çatışmır. Sosial şəbəkələrdən facebookdakı səhifəsi aktiv deyil.