Nərimanov Rayon İcra Hakimiyyəti www.narimanov-ih.gov.az domen adlı İnternet saytının monitorinqinin yekunu /İCMAL/

Azərbaycan Respublikası Nərimanov Rayon İcra Hakimiyyəti  www.narimanov-ih.gov.az İnternet resursunu dolğun informasiyalı saytlar sırasına aid etmək olmaz. Çünki saytın heç bir bölməsindəki informasiyaları qənaətbəxş hesab etmək olmaz. Bəzi bölmələrdəki informasiyalar köhnədir. Misal kimi İqtisadiyyat bölməsindəki hesabat xarakterli məlumatın 2011-ci ilə aid olduğunu göstərə bilərik. Rayon Bakı şəhəri ərazisində yerləşdiyindən daha çox məlumatlılığı, daha çox informasiyalılığı ilə seçilməli olduğu halda bölgə saytlarından heç nə ilə fərqlənmir, hətta bəzilərindən geri də qalır.  Saytın heç bir bölməsindəki məlumatı yararlı saymaq olmaz. Elektron xidmətlər, elektron müraciətlər bölmələri tamamilə boşdur. Rayon ərazisində yerləşən idarələrin yalnız rəhbərlərinin adları və şəhər telefon nömrələri göstərilib, idarələr haqda məlimatlar yoxdur. Xəbərlər bölməsini də qənaətbəxş hesab etmək olmaz, informasiyalar arasındakı məsafə bir aya qədərdir. Saytın sosial şəbəklərə də çıxışı yoxdur.

Beləliklə, Nərimanov Rayon İcra Hakimiyyəti saytinın ümumi mənzərəsi aşağıdakı kimidir:

1.  Rayonun tarixi, əhalisi, coğrafi mövqeyi, iqtisadiyyatı, təhsili, səhiyyəsi, mədəniyyəti, idmanı haqqındakı bilgilər kifayət qədər deyil. Qurumun rəhbəri haqqında verilmiş məlumat normaldır. Qurumun tarixi, quruma daha öncə başçılıq etmiş şəxslər barədə məlumat, qurumunun fəaliyyətini təmin edən qanunverici baza, qurumun səlahiyyət çərçivələri barədə isə saytda məlumat verilmir.

2. Əhalinin üçün qurumun ünvanı, telefon və faks nömrəsi, e-poçt ünvanı göstərilsə də, burada  sadəcə qəbul günləri və qəbul saatları göstərilir. Əhalini birbaşa qəbul edəcək rəhbər işçilərin telefon nömrələri saytda öz əksini tapmayıb. Quruma başqa yerlərdən getmək üçün marşrut və ictimai nəqliyyat haqqında da məlumatlara da rast gəlinmir.

3.  Qurumun strukturu haqqında sxem və müavinlər haqqında mə­lumatlar var, amma onlarla əlaqə kimi yalnız şəhər nömrələri göstərilir.  Struktur bölmələrinin səlahiyyət çərçivələri, qurumun tabeli­yindəki informasiya sistemləri haqqında da məlumatlar saytda öz əksini tapmır.

4.  Qurumun rəhbəri haqda məlumat olsa da, struktur bölmələrinin rəhbərləri haqqında informasiya çox azdır. Onlarla əks əlaqə imkanları haqqında da bilgilər təqdim edilmir. Bütün mümkün struktur bölmələrinin rəhbərləri haqqında bioqrafik bilgilər də yoxdur.

5.  Cari informasiyalar baxımından sayt elə də zəngin sayıla bilməz. Informasiyalar arasındakı vaxt intervalı hətta bir aya qədər uzanır. Qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) və dövlət qurumunun həyata keçirdiyi proqram və layihələr barədə də heç bir bilgi təqdim edilmir.

6.   Saytda qurumun büdcəsi, büdcənin  icrası haqqında,  büdcədənkənar daxil­olmalar və onların istiqamətləri, subsidiya alanlar haqda informasiyalara da rast gəlmək olmur.

7.  Onlayn müraciət imkanı olsa da, qurumun təklif etməli olduğu mütləq və əlavə xidmətlər  haqqında da heç bir bilgi yoxdur.

8.   Boş iş yerləri və işə qəbulla bağlı (qurum və onun struktur böl­mələrinə işə qəbulun hüquqi bazası, işə qəbulun norma və qaydaları,  işə qəbulla bağlı komissiyalar haqqında, qurum  və onun struktur bölmələrindəki mövcud boş iş yerləri haqqında elanlar və elanların arxivi) məlumatlar da təqdim edilməyən bilgilər sırasındadır.

9.   Qurumun işçilərinin əmək haqları ilə bağlı heç bir məlumat verilmir.

10.  Əhalinin qəbulu ilə bağlı yalnız rəhbər və ayrı-ayrı vəzifəli şəxsləri tərəfindən vətəndaşların sadəcə qəbul günləri və saatları barədə bilgilər var. Burada nə vəzifəli şəxslərin əlaqə nömrələri, nə onlar  tərəfindən vətəndaşların qəbul norma və qaydaları, nə də qurumda vətəndaşların qəbul qaydaları haqqında bilgilər təqdim edilmir.

11.  Tender və yarışmalar haqqında hər hansı bilgiyə rast gəlinmir.

12.  Saytın texniki imkanları normal səviyyədədir. Onlayn müraciət forması təqdim olunsa da,  abunə imkanı yoxdur.