Rabitə və İnformasiya Texnologiyaları Nazirliyinə məxsus www.mincom.gov.az ünvanındakı İnternet resursunun təkmilləşdirilməsi ilə bağlı tövsiyələr

Azərbaycan Respublikası Rabitə və İnformasiya Texnologiyaları Nazirliyinin İnternet saytı xeyli zəngin təsir bağışlayır. Doğrudur, ilk baxışdan bəzi informasiyalar (məsələn, büdcə kimi) var kimi görünürsə də ziyarət zamanı bunların daha çox ümumi xarakterli və bəzən də köhnə olması aşkarlanır. Təbii ki, İT əsrində informasiyanın hər saniyə ərzində köhnələ bilməsini nəzərə alsaq bunu ciddi çatışmazlıq hesab etmək olar. Bununla belə saytın müsbət xüsusiyyətlərini bir daha qeyd edir və onun təkmilləşdirilməsi ilə bağlı bəzi tövsiyələrimizi verməyi lazım bilirik.

1. Hər şeydən öncə yaxşı olar ki, resursun domen adı daha anlaşıqlı və Azərbaycan dilli oxucuya asan olacaq bir şəkildə olsun. Məsələn, www.ritn.gov.az kimi.

2. Saytda nazirliyin özünə aid olan informasiyaların yerləşdirilməsi daha məqsədəuyğun olardı. Məsələn, orada ümumi dövlət büdcəsinin yerləşdirilməsi elə də zəruri deyil. Halbuki RİTN-in büdcəsi ilə bağlı sorğusu olanlar onu burada axtarmaqda haqlıdırlar. Düşünmürük ki, Azərbaycanın ümumi dövlət büdcəsi üçün kimsə RİTN-in saytına müraciət etsin.

3. İşə qəbulla bağlı elanların olması özlüyündə yaxşı hal olsa da işə qəbul qaydalarının ayrıca bir bənddə verilməsi də məqsədəuyğun olardı.

4. Ştat cədvəlləri haqqında bilgilərin yoxluğu da saytın daha aşağı qiymətləndirilməsinə səbəb olan amillər sırasındadır.

5. Daha bir çatışmazlıq vətəndaşların qəbul qaydaları və qəbul günləri (saatları) barədə bilgilərin olmamasıdır.

6. Yaxşı olardı ki, bu saytda xəbərlərə və bu qəbildən olan xidmətlərə abunə imkanları da olaydı.

7. Şikayət, təklif və sorğuların icmalının verilməməsi də çatışmazlıqlar sırasındadır.

8. Daha bir çatışmazlıq isə informasiya sahibinin mülkiyyəti və mülkiyyət öhdəliyi haqqında bilgilərin yoxluğudur və s.