“İctimai informasiya subyektlərinin rəsmi internet resurslarının Monitorinqinin yekunları” mövzusunda Təqdimat mərasimi keçirilib.

posted by

13.05.2008
Multimedia
İnformasiya Sistemləri və Texnologiyaları
Mərkəzinin

Məlumatı

13 may 2008- ci il tarixdə “İnformasiya Azadlığının İnkişafı “ Koalisiyasının aparıcı qurumu

olan Multimedia Mərkəzi tərəfindən “İctimai informasiya subyektlərinin rəsmi internet resurslarının Monitorinqinin yekunları” mövzusunda Təqdimat mərasimi keçirilib.
Mərasimdə Multimedia Mərkəzinin direktoru Osman Gündüz “İctimai informasiya subyektlərinin rəsmi internet resurslarının Monitorinqinin yekunları” ilə bağlı Hesabatı və informasiya açıqlığı üzrə Reytinq Cədvəlini təqdim edib.
   Hesabatda son yarım il ərzində   dövlət orqanlarının rəsmi internet saytlarında yerləşdirilən informasiyanın kəmiyyət və keyfiyyət baxımından mövcud qanunvericiliyə uyğunluğu ilə bağlı vəziyyət öz əksini tapıb.
   Monitorinq prosesində qiymətləndirmə Koalisiya tərəfindən mövcud qanunvericiliyə və beynəlxalq normalara uyğun olaraq hazırlanan Metodika əsasında gerçəkləşdirilib. Qiymətləndirmənin yekunu olaraq bu mərhələdə 50 dövlət qurumunun informasiya açıqlığı üzrə Reytinq Cədvəlinin hazırlandığı bildirilib.
Monitorinqin nəticələrinə əsasən informasiya açıqlığı üzrə Reytinq Cədvəlində 1-ci , 2-ci və 3-cü yerləri müvafiq olaraq   Vergilər Nazirliyi (66%), RİTN (59%) və DİN (47%) tutub. Sonuncu yerlər isə Müəllif Hüquqları Agentliyinə, Kənd Təsərrüfatı Nazirliyinə və Xarici Ölkələrdə Yaşayan Azərbaycanlılarla iş üzrə Dövlət Komitəsinə məxsusdur.

Fövqəladə Hallar Nazirliyinin, Əmək və Əhalinin Sosial Müdafiəsi Nazirliyinin , Müdafiə Nazirliyinin saytları isə hələ də hazırlanmayıb.

50 dövlət qurumu üzrə orta informasiya açıqlığı göstəricisi isə ötən illə müqayisədə 10% artaraq 27 % təşkil edib.
Təqdimat mərasimində Layihənin eksperti Azər Həsrət, Milli Məclisin şöbə müdirinin müavini Yaşar Əməşov, İqtisadi Tədqiqatlar Mərkəzinin nümayəndəsi Dünya Camalova, Dövlət Qulluğu Məsələləri üzrə Komissiyanın nümayəndəsi Əli Kərim, Təhsil Nazirliyinin nümayəndəsi Akif Əliyev, Telejurnalist Qulu Məhərrəmli, müstəqil ekspert Rizvan Cəbiyev, Gün Səhər qəzetinin Baş redaktoru Arif Əliyev, Media Hüquqları İnstitutunun direktoru Rəşid Hacılı, Yerli özünüidarənin inkişafına dəstək" QHT Alyansının kordinatoru Abil Bayramov və digər nümayəndələr çıxış ediblər.

Çıxışlarda ictimai əhəmiyyət kəsb edən informasiyaların rəsmi saytlardan əldə edilməsi sahəsində son dövrlərdə müəyyən irəliləyişlərin olduğu bildirilib. Bununla belə qanunvericilikdə açıqlanması məcburi olan informasiyaların əksəriyyətinin hələ də rəsmi saytlardan əldə edilməsinin mümkünsüzlüyü qeyd olunub. İnformasiya müvəkkili institutunun formalaşmamağı məsələsinə yenidən toxunulub. Saytların ünvanlarının anlaşıqlı olmasının vacibliyi vurğulanıb. Monitorinqin nəticələrinin ictimailəşdirilməsinin və onun davamlı olaraq aparılmasının zəruriliyi qeyd olunub.
Təqdimat mərasimində hökumət qurumlarının nümayəndələri, müstəqil ekspertlər, özəl və ictimai sektorun təmsilçiləri, beynəlxalq təşkilatların nümayəndələri iştirak edib.
Monitorinq Counterpart International təşkilatı tərəfindən dəstəklənən “Vətəndaşların informasiya azadlığının gerçəkləşməsinə dəstək” Layihəsi çərçivəsində həyata keçirilib.
Geniş məlumat www.informasiya.org –da yerləşdirilib.

Multimedia Mərkəzi

Tel: 492 44 44