Azərbaycan Respublikası Daxili İşlər Nazirliyinin www.din.gov.az domen ünvanlı İnternet saytının bir sıra üstün məziyyətləri olsa da orada bəzi çatışmazlıqlar da gözə dəyir. Yəni sayt “İnformasiya əldə etmək haqqında” Azərbaycan Respublikası qanununun tələblərinə tam cavab vermir. Bunu nəzərə alaraq saytın işini təkmilləşdirməklə bağlı aşağıda bəzi tövsiyələrimizi diqqətə çatdırmaq istərdik:
1. Yaxşı olardı ki, e-poçt ünvanı və başqa əlaqə vasitələri ilə yanaşı nazirliyin və onun ayrı-ayrı struktur bölmələrinin yer ünvanları barədə də bilgi veriləydi.
2. Quruma vətəndaşların ayrı-ayrı istiqamətlərdən gələ bilməsi üçün marşrut və ictimai nəqliyyat vasitələri barədə bilginin verilməsi də məqsədəuyğundur.
3. Nazirliyin daxili istifadəsi üçün nəzərdə tutulan əmr və sərəncamlar barədə də bilgi verilməsi zəruridir. Eyni zamanda belə sənədlərin reestrini də saytda yerləşdirmək lazımdır.
4. Təəssüf ki, saytda nazirliyin büdcəsi barədə bir kəlmə də deyilmir. Halbuki qanun belə bilgilərin ümumaçıq olmasını tələb edir. Bu baxımdan ümumi dövlət büdcəsinin nazirliyə aid hissəsi və onun icrası barədə bilgiləri saytda yerləşdirmək vacibdir.
5. Qurum tərəfindən təklif edilən xidmətlər və onların pullu hissəsi ilə bağlı bilgiləri bir qədər də dolğun şəkildə təklif etməyə ehtiyac var.
6. İşə qəbulla bağlı mümkün komissiyalar, həmçinin işə qəbulun nəticələri, işə qəbulun nəticələri ilə bağlı mübahisələrin həlli qaydaları haqqında informasiyanın saytda yerləşdirilməsi də zəruri tələblər sırasındadır.
7. Daha bir zərurət sahə işçilərinin əmək haqları ilə bağlı bilgilərin sayta əlavə edilməsi ilə bağlıdır.
8. Vətəndaşların qəbulundan imtinanın əsasları və qəbulla bağlı mübahisələrin həlli yolları haqqında da bilgi vermək məqsədəuyğundur.
9. Tender və müsabiqələr barədə bilgilərdə tenderlərlə bağlı heç bir bilgi verilmir. Bu cür informasiyaların verilməsi şəffaflıq baxımından olduqca vacibdir.
10. Qurumun norma- (qanun)yaratma fəaliyyəti ilə bağlı bilgilərin də yerləşdirilməsi zəruridir.