www.meclis.gov.az – Azərbaycan Respublikası Milli Məclisinin İnternet saytı

Yəqin ki, İnternet ziyarətçiləri qanunverici orqanın saytı haqqında fərqli təsəvvürə malik olar. Məsələn, hər kəs düşünə bilər ki, qanunverici orqanın İnternet saytı ABŞ Kongresinin saytı kimi olmalıdır. Əslində belə də olmalıdır. Ancaq Azərbaycan Milli Məclisinin saytı haqqında bunu demək mümkün deyildir. Sadəcə, bu sayt da NK-nın saytı kimi hansısa həvəskar səviyyədə, həm də özfəaliyyət nəticəsində hazırlanmış resursa bənzəyir. MM-lə əlaqə üçün yalnız bir e-poçt unvanından başqa heç bir əlaqə vasitəsi göstərilməyən saytda aşağıdakı bölmələr yer alıb:

• Parlamentin tarixi: Azərbaycan parlamentinin qurulması və fəaliyyəti haqqında yazılar.
• Konstitusiya: Burada Konstitusiyanın tam mətni və Konstitusiya qanunları yer alıb.
• Qanunlar: 2002-ci ildən bu yana qəbul edilən qanunlar
• Struktur: yalnız MM sədrinin biografiyası yer alıb. Burada MM komissiyalarının tərkibi, eləcə də MM üzvlərinin tam siyahısı verilib. Heç bir biografik bilgi yoxdur.
• Beynəlxalq əlaqələr: parlamentlərarası əlaqələr üzrə işçi qrupların siyahısı və tərkibi
• İcra hakimiyyəti: www.president.az saytına keçid
• Qanun layihələri: MM-in müzakirəsində olan qanun layihələrinin siyahısı və mətnləri
• Xəbərlər: Gündəlik yenilənir. Ancaq xəbərlərin daha dolğun olmasına ehtiyac duyulur. Arxiv var.

Təbii ki, belə bir saytın ziyarətçiləri MM-lə əks əlaqə qurub öz ehtiyaclarını təmin edə bilməzlər. Bir də ki, bütün açılan yeni səhifələrin başlığı nəyə görəsə ingiliscədir. Bir neçə səhifənin başlığı isə sadəcə New Page kimi verilib. Bundan başqa qeyd olunan bölmələri ziyarət etmək də elə asan deyil. Çünki ana səhifədəki keçidlərə tıqladıqda, məsələn, belə bir ünvana, yəni boş səhifəyə gedib çıxacaqsınız: www.meclis.gov.az/struktur%5Cindex.htm. Halbuki bu ünvan belə olmalıdır ki, siz istədiyiniz səhifəni ziyarət edə biləsiniz: www.meclis.gov.az/struktur/index.htm. Göründüyü kimi keçidlər qeyd edilərkən şrift məsələsinə diqqət verilməyib və «/» əvəzinə «%5C» işarəsi ortaya çıxır.