Azərbaycan Respublikası Hesablama Palatasının www.ach.gov.az domen ünvanlı İnternet resursunda bir sıra diqqət çəkən və maraqlı informasiyalara rast gəlmək mümkündür. Xüsusən də qurumun rəhbərliyinə daxil olanlar haqqında verilən biografik bilgiləri qeyd etmək lazımdır. Bununla belə çatışmayan informasiyalar da az deyil. Ümumilikdə isə saytın təkmilləşdirilmə imkanları var və aşağıda onu ziyarət edərkən gördüklərimizi qələmə almaqla bunu bariz şəkildə göstərmək istərdik:
1. Qurumun özü ilə bağlı informasiyalar tam və dolğundur. Yalnız ona daha öncə başçılıq edən şəxslər barədə bilgi çatışmır.
2. Ziyarətçilərin əks əlaqəsi üçün imkanlar da yetərincədir. Burada çatışmayan qurumun ünvanının marşrut və sxemi, həmçinin bura gəlmək üçün ictimai nəqliyyat haqqında bilgidir.
3. Palatanın strukturu haqqında bilgi verilir. Yalnız struktur bölmələrinin ünvanları və səlahiyyət çərçivələri barədə informasiya gözə dəymir.
4. Rəhbər və rəhbər işçilər barədə yetərli bilgi var. Yalnız struktur bölmələrinin rəhbərləri ilə ayrıca əks əlaqə təklif edilmir.
5. Palatanın cari fəaliyyəti haqqında informasiya bölməsində qurumdaxili əmr və sərəncamlar çatışmır.
6. Ümumi dövlət büdcəsinin rəqəmlə ifadəsi və onun palataya aid hissəsi barəsində heç bir bilgi verilmir.
7. Palata tərəfindən təklif edilən xidmətlər barədə ayrıntılı bilgi də nəzərə çarpmır.
8. İşə qəbul qaydaları və boş iş yerləri haqqında heç bir bilgi yoxdur.
9. Sahə işçilərinin əmək haqları barədə hər hansı bilgiyə rastlanmır.
10. Vətəndaşların qəbulu ilə bağlı bölmədə qaydalar və qəbuldan imtinanın əsasları haqqında heç nə deyilmir.
11. Tender və müsabiqələr haqqında da hər hansı bilgi verilmir.
12. Qurumun norma- (qanun)yaratma fəaliyyəti ilə bağlı bilgiləri bir qədər də zənginləşdirməyə gərək var.
13. Saytın texniki imkanları yerindədir.