Azərbaycan Respublikasının Prezidenti Yanında Dövlət Qulluğu Məsələləri üzrə Komissiyanın www.dqmk.az domen ünvanlı İnternet resursu xeyli informasiya yükü daşıması baxımından yaxşı mənada fərqli təsir bağışlayır. Burada başqa İnternet resurslarında rast gəlmədiyimiz və şəffaflığın təmini baxımından olduqca gərəkli sayıla biləcək bilgilərin yer alması, əlbəttə ki, sevindiricidir. Bununla belə onu da qeyd etmək lazımdır ki, sayt heç də yüzdə yüz tələblərə cavab verəcək həddə deyil. Beləliklə, komissiyanın saytında müşahidə etdiklərimiz:
1. Qurumun özü ilə bağlı bilgilər demək olar ki, tam və dolğundur.
2. Ziyarətçilərin əks əlaqəsi üçün bütün imkanlar təklif edilir. Yalnız quruma gəlmək üçün ictimai nəqliyyat imkanları haqqında bilgi verilmir.
3. Qurumun strukturu ilə bağlı da yetərincə bilgi var. Çatışmayan struktur bölmələrinin ünvanlarıdır.
4. Rəhbər və rəhbər işçilər barədə biografik bilgilər verilir. Əks əlaqə də yetərli sayıla bilər.
5. Qurumun cari fəaliyyəti saytda yetərincə əhatə olunur. Burada çatışmayan həyata keçirilən plan və proqramlar haqqında bilgi, eyni zamanda qurumdaxili əmr və sərəncamların reyestridir.
6. Ümumi dövlət büdcəsinin rəqəmlə ifadəsi və onun quruma aid hissəsinin ayrıntıları barədə bilgilər yetərli sayıla biləcək həddə deyil.
7. Qurum tərəfindən təklif edilən xidmətlər haqqında bilgilər də yetərli səviyyədə deyil.
8. İşə qəbul qaydaları və boş iş yerləri haqqında bilgilər saytda gözə dəymir.
9. Sahə işçilərinin əmək haqları barədə də heç bir bilgi verilmir.
10. Vətəndaşların qəbul qaydaları və qəbul vaxtları barədə bilgilər verilmir.
11. Tender və yarışmalar barədə bilgilər tam deyil.
12. Qurumun norma- (qanun)yaratma fəaliyyəti haqqında heç bir bilgi verilmir.
13. Saytın texniki imkanları standartlara cavab verə biləcək hesab edilə bilər.