AzərTAc – Azərbaycan Dövlət Teleqraf Agentliyinin www.azertag.com domen adlı İnternet resursu təəccübləndirəcək qədər boşdur. Saytda yalnız qurum haqqında bilgilər və onun xidmət sahəsinə aid olan xəbər yayımı barədə bilgilər var. Bundan başqa əks əlaqə imkanları haqqında bilgi verilir. Başqa bölmələr üzrə demək olar ki, heç bir bilgi tapmaq mümkün deyildir. Halbuki bu bir dövlət agentliyi olması səbəbindən onun saytında digər qurumlarla müqayisədə daha dolğun bilgi olmalıydı. Burada hətta e-poçtla abunə imkanı da yoxdur. Saytın ümumi durumu aşağıda təqdim etdiyimiz kimidir.
1. Qurum haqqında bilgilər bölməsində yalnız onun tarixi və bu günü barədə bilgi var. Onun rəhbərləri, səlahiyyət çərçivələri, qanunverici bazası, hakimiyyət qolunda yeri barədə heç bir bilgi verilmir.
2. Ziyarətçilərin əks əlaqəsi üçün qurumun ünvanı, ümumi xarakterli telefon və faks nömrələri, həmçinin e-poçt ünvanı təqdim edilir. Həm də onlayn müraciət forması var. Lakin onun ünvanının marşrut və sxemi, ora gəlmək üçün ictimai nəqliyyat barədə bilgilər təqdim edilmir.
3. Qurumun strukturu haqqında heç bir bilgi yoxdur.
4. Rəhbər və digər rəhbər işçilər, onlarla əks əlaqə imkanları haqqında da saytda heç bir bilgiyə rast gəlinmir.
5. Təəssüf ki, ən vacib bölmələrdən olan qurumun cari fəaliyyəti bölməsi də boşdur.
6. Daha bir çatışmayan informasiya ümumi dövlət büdcəsi ilə bağlıdır.
7. Dövlət qurumu tərəfindən təklif edilən xidmətlər barədə isə yalnız qurumun təklif etdiyi əlavə xidmətlər haqqında bilgi verilir.
8. Boş iş yerləri və işə qəbulla bağlı da heç bir bilgi yoxdur.
9. Sahə işçilərinin əmək haqları barədə də eyni sözləri demək mümkündür.
10. Vətəndaşların qəbulu şərtləri və qəbul günləri (saatları) barədə də hər hansı bilgilərə rast gəlmək mümkün deyil.
11. Eyni hal tender və yarışmalar haqqında da müşahidə olunur.
12. Daha bir boş bölmə qurumun norma- (qanun)yaratma fəaliyyəti haqqındadır.
13. Saytın texniki imkanları normal dəyərləndirilə bilər. Burada onlayn müraciət forması olsa da e-poçtla abunə imkanı yoxdur. Yalnız RSS abunə imkanı təklif edilir.