“İctimai informasiyaların açıqlanmasının aktual problemləri və onların həlli sahəsində vətəndaş cəmiyyətinin rolunun gücləndirilməsi” mövzusunda Dəyirmi Masa keçirilib

posted by

06. 06. 2007
                                            Multimedia
                       İnformasiya Sistemləri və Texnologiyaları
                                         Mərkəzinin

                                           Məlumatı

     06 iyun 2007- ci il tarixdə “İnformasiya Azadlığının İnkişafı “ Koalisiyasının aparıcı qurumu olan Multimedia İnformasiya Sistemləri və Texnologiyaları Mərkəzi tərəfindən “İctimai informasiyaların açıqlanmasının aktual problemləri və onların həlli sahəsində vətəndaş cəmiyyətinin rolunun gücləndirilməsi” mövzusunda Dəyirmi Masa keçirilib.
    Dəyirmi Masa Counterpart International təşkilatı tərəfindən dəstəklənən “Vətəndaşların informasiya azadlığının gerçəkləşməsinə dəstək” Layihəsi çərçivəsində həyata keçirilir.
     Dəyirmi Masada Multimedia Mərkəzinin direktoru, Layihənin rəhbəri Osman Gündüzün, Layihənin ekspertləri Ələsgər Məmmədlinin, Azər Həsrətin və Vüqar Tofiqlinin mövzu ətrafında təqdimatları olub. Dəyirmi Masada həmçinin dövlət orqanlarının internet resurslarından informasiyaların əldə edilməsi vəziyyətini qiymətləndirmək üçün Koalisiya tərəfindən hazırlanan “Dövlət orqanlarının internet resurslarının monitorinqinin METODOLOGİYASI” təqdim olunub.
     Dəyirmi Masada İnformasiya Texnologiyaları İnstitutunun direktoru AMEA-nın müxbir üzvü Rasim Əliquliyev, Müstəqil Hüquq Mərkəzinin rəhbəri Aydın Kərimov, Gənc Yazarlar Birliyinin rəhbəri, kulturoloq Aydınxan Əbilov, İTV-nin Elm və Təhsil Departamentinin rəhbəri Cəsarət Valehov, RİTN-in İnformasiya Cəmiyyətinin İnkişafı Departamentinin rəhbəri Rüfət Gülməmmədov, Təhsil Nazirliyinin nümayəndəsi Ceyhun Məmmədov , İnKoTEX ictimai Birliyindən Firudin Əhmədov, Qəsəbə Bələdiyyələri Assosiasiyasının Departament rəhbəri Tofiq Həsənov, Veb dizayner Cahid Novruzov, MEGA şirkətinin meneceri Qabil Qasımov, Sabiq millət vəkili Rizvan Cəbiyev, Neft Akademiyasının dosenti Nazim Rüstəmov və digərləri çıxış ediblər
     Dəyirmi Masada , kifayət qədər normal olan İnformasiya əldə edilməsi haqqında Qanunun tələblərinin yerinə yetirilməsi üzərində vətəndaş cəmiyyətinin ictimai nəzarətinin gerçəkləşdirilməsi istiqamətində atılan bu cür addımların zəruri və faydalı olduğu bildirilib. Dövlət orqanlarının İnternet resurslarının fəaliyyətinin təkmilləşdirilməsi istiqamətində   səmərəli təkliflər irəli sürülüb. Dövlət orqanlarının informasiya açıqlığı vəziyyətinin daha da qabarıq   və dəqiq analiz edilməsi üçün Metedologiyanın təkmilləşdirilməsinin vacibliyi də vurğulanıb. Təhlükəsizlik, statistika və texniki-texnoloji standartlar məsələsinə əməl edilməsinin vacibliyi qeyd olunub. Qanunun icrasına nəzarət məqsədilə yaradılmalı olan İnformasiya müvəkkili institutunun formalaşmamağından da narahatçılıq bildirilib. Elektron Azərbaycan dövlət proqramının icrası prosesinə vətəndaş cəmiyyətinin cəlb edilməsi, ümumiyyətlə cəmiyyətin bütün sahələrinə tətbiq istiqamətində bu Proqramda konkret tədbirlərin nəzərdə tutulması, onun maliyyə təminatının yaxşılaşdırılması istiqamətində təkliflər irəli sürülüb.
     Dəyirmi Masada hökumət qurumlarının nümayəndələri, müstəqil ekspertlər, özəl və ictimai sektorun təmsilçiləri, beynəlxalq təşkilatların nümayəndələri iştirak edib.

Multimedia Mərkəzi
Tel: 492 44 44
www.informasiya.org
info@informasiya.org