Qaradağ Rayon İcra Hakimiyyəti www.qaradagh-ih.gov.az domen adlı İnternet saytının monitorinqinin yekunu /İCMAL/

Azərbaycan Respublikası Qaradağ Rayon İcra Hakimiyyəti  www.qaradagh-ih.gov.az ünvanlı İnternet resursundan rayon haqqında, demək olar ki, yetərli bilgi təqdim edilir.  Saytda başqa saytlardan fərqli olaraq rayon haqqında bir sıra əlavə məlumatlar da əldə etmək olar. Rayonun idarələri, Prezidentin səfərləri, elektron hökumə portalı, Dağlıq Qarabağ münaqişəsi, millət vəkilləri kimi bölmələr rayon haqqındakı təsəvvürü, məlumatlılığı daha da artırır. Amma elə bölmələr var ki, (fəaliyyət, elektron müraciətlər, elektron xidmətlər) ümumiyyətlə boşdur. Saytın görünüşü normal, istifadəsi də rahatdır. Xəbərlər bölməsini qənaətbəxş hesab etmək olar, informasiyaların yenilənməsi diqqət çəkir. Rayonun tarixi, təhsili, mədəniyyəti, səhiyyəsi haqda məlumatlar genişdir. Bu baxımdan qurumun internet resursunu müsbət qiymətləndirmək olar. Amma təqdim edilməsi bəzi vacib, gərəkli olan bilgilərin olmaması gözdən qaçmır.

Beləliklə, Qaradağ Rayon İcra Hakimiyyəti saytinın ümumi mənzərəsi aşağıdakı kimidir:

1.  Rayonun tarixi, təhsili, səhiyyəsi, mədəniyyəti, iqtisadyyatı, idmanı haqqındakı bilgilər kifayət qədərdir. Rayonun əhalisi  haqdakı bilgilər isə yoxdur. Qurumun tarixi, quruma daha öncə başçılıq etmiş şəxslər barədə məlumat, qurumunun fəaliyyətini təmin edən qanunverici baza, qurumun səlahiyyət çərçivələri barədə isə məlumat verilmir.

2.  Ziyarətçilərin əks əlaqəsi üçün informasiyalar qənaətbəxş deyil. Qurumun ünvanı, telefon və faks nömrəsi, e-poçt ünvanı verilsə də, bunların ayrı-ayrı bölmələrdə olması ziyarətçiləri çaşdıra bilər. Vətəndaşların qəbulu bölməsində əhalini qəbul edəcək səlahiyyətli şəxslərin qəbul günləri və saatları göstərilsə də, əhalini qəbul edəcək rəhbər işçilərin telefon nömrələri saytda öz əksini tapmayıb. Quruma başqa yerlərdən getmək üçün marşrut və ictimai nəqliyyat haqqında məlumatlara da rast gəlinmir.

3.  Qurumun strukturu haqqında sxem və müavinlər haqqında mə­lumatlar, onların bəzilərinin əlaqə nəmrələri (sabit telefon) saytda var. Şura bölməsindəki bilgilər isə çox azdır.  Struktur bölmələrinin səlahiyyət çərçivələri, qurumun tabeli­yindəki informasiya sistemləri haqqında da məlumatlar saytda öz əksini tapmır.

4.  Qurumun rəhbəri haqqında bioqrafik məlumat var. Amma ayrı-ayrı struktur bölmələrinin rəhbərləri ilə əks əlaqə imkanları haqqında da bilgilər təqdim edilir. Müavinlər, bütün mümkün struktur bölmələrinin rəhbərləri haqda da bioqrafik məlumatlara rast gəlmək olmur.

5.  Cari informasiyalar baxımından saytı qənaətbəxş hesab etmək olar. Amma verilən informasiyalar arasındakı vaxt intervalı azaldılsa, daha da yaxşı olar. Qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) və dövlət qurumunun həyata keçirdiyi proqram və layihələr barədə də heç bir bilgi təqdim edilmir.

6.   Qurumun büdcəsi, büdcənin  icrası haqqında,  büdcədənkənar daxil­olmalar və onların istiqamətləri barədə informasiyalar saytda olmasa da, subsidiya alanlar haqda məlumata rast gəlmək olur.

7.  Qurumun təklif etməli olduğu mütləq və əlavə xidmətlər  haqqında da heç bir bilgi yoxdur. Burada yalnız onlayn müraciət imkanı təqdim edilir.

8.   Boş iş yerləri və işə qəbulla bağlı (qurum və onun struktur böl­mələrinə işə qəbulun hüquqi bazası, işə qəbulun norma və qaydaları,  işə qəbulla bağlı komissiyalar haqqında, qurum  və onun struktur bölmələrindəki mövcud boş iş yerləri haqqında elanlar və elanların arxivi) məlumatlar da təqdim edilməyən bilgilər sırasındadır.

9.   Qurumun işçilərinin əmək haqları ilə bağlı heç bir məlumat verilmir.

10.  Vətəndaşların qəbulu ilə bağlı yalnız rəhbər və ayrı-ayrı vəzifəli şəxsləri tərəfindən vətəndaşların sadəcə qəbul günləri və saatları barədə bilgilər var. Burada nə vəzifəli şəxslərin əlaqə nömrələri və onlar  tərəfindən vətəndaşların qəbul norma və qaydaları, nə də qurumda vətəndaşların qəbul qaydaları haqqında bilgilər təqdim edilmir.

11.  Tender və yarışmalar haqqında hər hansı bilgiyə rast gəlinmir.

12.  Saytın texniki imkanları normal səviyyədədir. Onlayn müraciət forması təqdim olunsa da,  abunə imkanı yoxdur.