Qəbələ Rayon İcra Hakimiyyəti www.qebele-ih.gov.az domen adlı İnternet saytının monitorinqinin yekunu /İCMAL/

Azərbaycan Respublikası Qəbələ Rayon İcra Hakimiyyətinin  www.qebele-ih.gov.az ünvanlı İnternet resursunda rayon haqqında yetərli, hərtərəfli bilgi təqdim edilir.  Saytda rayon haqqında o qədər ətraflı, dolğun məlumatlar da əldə etmək olar ki, monitorinq apardığımız saytlar arasında bu günə qədər belə dolğun informasiyalı mənbəyə rast gəlməmişik. Rayonda fəaliyyət göstərən  idarə və müəssisələr, Prezidentin Qəbələyə səfərləri, istirahət və əyləncə mərkəzləri, Rayonda olan Şəhidlər xiyabanı haqqında, “Qəbələ” qəzeti kimi bölmələr rayon haqqındakı təsəvvürü, məlumatlılığı daha da artırır. Diqqət çəkən məqamlardan biri də bölmələrdə məlumatların təqdimində birbaşa əlaqəli şəkillərdən istifadə edilməsidir. Rayon icra aparatının əhaliyə açıq olmasının göstəricilərindən biri hesab olunan sosial şəbəkələrdən istifadədir ki, Qəbələ İcra Hakimiyyətinin həm facebook, həm də twitter sosial şəbəkələrindəki səhifələri buna nümunədir. Saytın görünüşü normal, istifadəsi də rahatdır. Xəbərlər bölməsini qənaətbəxş hesab etmək olar, daim informasiyaların yenilənməsi diqqət çəkir. Amma təqdim edilməsi bəzi vacib, gərəkli olan bilgilərin olmaması gözdən qaçmır.

Beləliklə, Qəbələ Rayon İcra Hakimiyyəti saytinın ümumi mənzərəsi aşağıdakı kimidir:

1.  Rayonun tarixi, təhsili, səhiyyəsi, mədəniyyəti, iqtisadyyatı, idmanı, bütövlükdə rayon haqqında  çox bilgiləri asanlıqla saytdan almaq mümkündür. Amma qurumun tarixi, quruma daha öncə başçılıq etmiş şəxslər barədə məlumat, qurumunun fəaliyyətini təmin edən qanunverici baza, qurumun səlahiyyət çərçivələri barədə isə məlumat verilmir.

2.  Ziyarətçilərin əks əlaqəsi üçün informasiyalar da qənaətbəxşdir. Lakin qurumun ünvanı, telefon və faks nömrəsi, e-poçt ünvanı verilsə də, bunların ayrı-ayrı bölmələrdə olması ziyarətçiləri çaşdıra bilər. Vətəndaşların qəbulu bölməsində əhalini qəbul edəcək səlahiyyətli şəxslərin qəbul günləri və saatları, hətta icra başçısının da  rayonun yaşayış məntəqələrində keçirəcəyi görüş-qəbullarının qrafiki göstərilsə də, əhalini qəbul edəcək rəhbər işçilərin telefon nömrələri saytda öz əksini tapmayıb. Quruma başqa yerlərdən getmək üçün marşrut və ictimai nəqliyyat haqqında məlumatlara da rast gəlinmir.

3.  Qurumun strukturu haqqında sxem və müavinlər haqqında mə­lumatlar, onların əlaqə nəmrələri (sabit telefon), e-poçt ünanları saytda var. Hətta inzibati ərazi dairəsi üzrə nümayəndələrin də siyahısı sxem şəklində göstərilb. Burada onların mobil nömrələrini də tapmaq mümkündür. Şura bölməsindəki bilgilər isə çox azdır.  Struktur bölmələrinin səlahiyyət çərçivələri, qurumun tabeli­yindəki informasiya sistemləri haqqında da məlumatlar saytda öz əksini tapmır.

4.  Qurumun rəhbəri haqqında bioqrafik məlumat yoxdur. Ayrı-ayrı struktur bölmələrinin rəhbərləri ilə əks əlaqə imkanları haqqında da bilgilər təqdim edilmir. Müavinlər, bütün mümkün struktur bölmələrinin rəhbərləri haqda da bioqrafik məlumatlara rast gəlmək olmur.

5.  Cari informasiyalar baxımından saytı qənaətbəxş hesab etmək olar. Verilən informasiyalar daim yenilənməsi diqqət çəkir. Qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) və dövlət qurumunun həyata keçirdiyi proqram və layihələr barədə sə heç bir bilgi təqdim edilmir.

6.   Qurumun büdcəsi, büdcənin  icrası haqqında,  büdcədənkənar daxil­olmalar və onların istiqamətləri barədə informasiyalara,  subsidiya alanlar haqda məlumatlara da saytda rast gəlmək olmur.

7.  Qurumun təklif etməli olduğu mütləq və əlavə xidmətlər  haqqında da heç bir bilgi yoxdur. Burada yalnız onlayn müraciət imkanı təqdim edilir.

8.   Boş iş yerləri və işə qəbulla bağlı (qurum və onun struktur böl­mələrinə işə qəbulun hüquqi bazası, işə qəbulun norma və qaydaları,  işə qəbulla bağlı komissiyalar haqqında, qurum  və onun struktur bölmələrindəki mövcud boş iş yerləri haqqında elanlar və elanların arxivi) məlumatlar da təqdim edilməyən bilgilər sırasındadır.

9.   Qurumun işçilərinin əmək haqları ilə bağlı heç bir məlumat verilmir.

10.  Vətəndaşların qəbulu ilə bağlı yalnız rəhbər və ayrı-ayrı vəzifəli şəxsləri tərəfindən vətəndaşların sadəcə qəbul günləri və saatları barədə bilgilər var. Burada nə vəzifəli şəxslərin əlaqə nömrələri və onlar  tərəfindən vətəndaşların qəbul norma və qaydaları, nə də qurumda vətəndaşların qəbul qaydaları haqqında bilgilər təqdim edilmir.

11.  Tender və yarışmalar haqqında hər hansı bilgiyə rast gəlinmir.

12.  Saytın texniki imkanları normal səviyyədədir. Onlayn müraciət forması təqdim olunsa da,  abunə imkanı yoxdur.