Şuşa Rayon İcra Hakimiyyəti www.shusha-ih.gov.az domen adlı İnternet saytının monitorinqinin yekunu /İCMAL/

Azərbaycan Respublikası Şuşa Rayon İcra Hakimiyyəti  www.shusha-ih.gov.az İnternet resursundan rayon haqqında demək olar ki, məlumat almaq mümkün deyil. Saytın görünüşü normal, istifadəsi də rahat olsa da rayonun coğrafi mövqeyi, əhalisi,  iqtisadiyyatı haqqında bilgilər yox səviyyəsindədir. Rayonun tarixi,  təhsili, mədəniyyəti, səhiyyəsi və idmanı haqda məlumatlar isə genişdir.

Şuşa rayonu işğal alında olduğundan saytda bunu əks etdirəcək heç bir bölməyə rast gəlmədik. Burada nə rayonun işğalından, nə şəhidləri və Milli Qəhrəmanları haqda heç bir məlumat almaq mümkün deyil, çünki saytda nə belə bir bölmə, nə də hansısa bir bölmədə bu haqda məlumat yoxdur.

Bundan əlavə bələdiyyələr, fəaliyyət, infrastruktur hissəsindəki poçt və rabitə, banklar, qanunvericilik hissəsindəki qanunlar, fərman və sərəncamlar bölmələri hamısı boşdur.

Xəbərlər bölməsini qənaətbəxş hesab etmək olmaz, informasiyaların yenilənməməsi diqqət çəkir.

Beləliklə, Şuşa Rayon İcra Hakimiyyəti saytinın ümumi mənzərəsi aşağıdakı kimidir:

1.  Rayonun tarixi, təhsili, səhiyyəsi, mədəniyyəti, idmanı haqqındakı bilgilər kifayət qədərdir, qurum, qurumun rəhbəri haqqında verilmiş  məlumatlar qənaətbəxşdir. Rayonun əhalisi, iqtisadiyyatı haqdakı bilgi isə yox səviyyəsindədir. Qurumun tarixi, quruma daha öncə başçılıq etmiş şəxslər barədə məlumat, qurumunun fəaliyyətini təmin edən qanunverici baza, qurumun səlahiyyət çərçivələri barədə isə məlumat verilmir.

2.  Ziyarətçilərin əks əlaqəsi üçün qurumun ünvanı, telefon və faks nömrəsi, e-poçt ünvanı verilsə də, birbaşa əhalini qəbul edəcək rəhbər işçilərin telefon nömrələri də saytda yoxdur. Quruma başqa yerlərdən getmək üçün marşrut və ictimai nəqliyyat haqqında məlumatlara da rast gəlinmir.

3.  Qurumun strukturu haqqında sxem və müavinlər haqqında mə­lumatlar yararsızdır, onlarla əlaqə nəmrələri də saytda yoxdur. Şura bölməsindəki bilgilər də çox azdır.  Struktur bölmələrinin səlahiyyət çərçivələri, qurumun tabeli­yindəki informasiya sistemləri haqqında da məlumatlar saytda öz əksini tapmır.

4.  Qurumun rəhbəri haqda qısa bioqrafik məlumat var, amma ayrı-ayrı struktur bölmələrinin rəhbərləri ilə əks əlaqə imkanları haqqında bilgilər təqdim edilmir. Bütün mümkün struktur bölmələrinin rəhbərləri haqqında bioqrafik bilgilər də yoxdur.

5.  Cari informasiyalar baxımından sayt zəngin sayıla bilər. Monitorinq apardığımız müddətdə saytdakı sonuncu informasiya cari ilin bu ayına (iyul) aiddir. Qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) və dövlət qurumunun həyata keçirdiyi proqram və layihələr barədə də heç bir bilgi təqdim edilmir.

6.   Qurumun büdcəsi, büdcənin  icrası haqqında,  büdcədənkənar daxil­olmalar və onların istiqamətləri barədə informasiyalara da saytda rast gəlmək olmur.

7.  Qurumun təklif etməli olduğu mütləq və əlavə xidmətlər  haqqında da heç bir bilgi yoxdur. Burada yalnız onlayn müraciət imkanı təqdim edilir.

8.   Boş iş yerləri və işə qəbulla bağlı (qurum və onun struktur böl­mələrinə işə qəbulun hüquqi bazası, işə qəbulun norma və qaydaları,  işə qəbulla bağlı komissiyalar haqqında, qurum  və onun struktur bölmələrindəki mövcud boş iş yerləri haqqında elanlar və elanların arxivi) məlumatlar da təqdim edilməyən bilgilər sırasındadır.

9.   Qurumun işçilərinin əmək haqları ilə bağlı heç bir məlumat verilmir.

10.  Vətəndaşların qəbulu ilə bağlı yalnız rəhbər və ayrı-ayrı vəzifəli şəxsləri tərəfindən vətəndaşların qəbul günləri və saatları barədə bilgilər var. Burada vəzifəli şəxslərin əlaqə nömrələrinə də rast gəlinmir. Rəhbər işçilər tərəfindən nə vətəndaşların qəbul norma və qaydaları, nə də qurumda vətəndaşların qəbul qaydaları haqqında bilgilər təqdim edilmir.

11.  Tender və yarışmalar haqqında hər hansı bilgiyə rast gəlinmir.

12.  Saytın texniki imkanları normal səviyyədədir. Onlayn müraciət forması təqdim olunsa da,  abunə imkanı yoxdur.