Xəzər Rayon İcra Hakimiyyəti www.xazar-ih.gov.az domen adlı İnternet saytının monitorinqinin yekunu /İCMAL/

Azərbaycan Respublikası Xəzər Rayon İcra Hakimiyyəti  www.xazar-ih.gov.az İnternet resursundan rayon haqqında qismən məlumatlı hesab etmək olar. Saytın görünüşü normal, istifadəsi də rahatdır. Rayonun iqtisadiyyatı, əhalisi, təhsili, mədəniyyəti haqda məlumatlar genişdir. Amma rayonun tarixi, coğrafi mövqeyi, idmanı haqqındakı məlumatları dolğun hesab etmək olmaz.

Saytın digər bölmələri də geniş informasiyalıdır. Rayonun idarələri, Prezidentin rayona səfərləri, dövlət orqanlarının saytları, elanlar bölmələri informasiya almaq baxımından yararlıdır. Xəbərlər bölməsini də qənaətbəxş hesab etmək olar, informasiyaların daim yenilənməsi diqqət çəkir.

Saytda sual-cavab və təkliflər bölməsi bar ki, təəssüf ki, ora daxil olanda tamamilə başqa məlumatla qarşılaşdıq. Təqdim edilməsi bəzi vacib, gərəkli olan bilgilərin olmaması gözdən qaçmır.

Beləliklə, Xəzər Rayon İcra Hakimiyyəti saytinın ümumi mənzərəsi aşağıdakı kimidir:

1.  Rayonun əhalisi, iqtisadiyyatı, təhsili, mədəniyyəti, səhiyyəsi, haqqındakı bilgilər kifayət qədərdir, amma rayonun tarixi, coğrafi mövqeyi, idmanı, qurum, qurumun rəhbəri haqqında verilmiş məlumatlar isə qənaətbəxş deyildir. Qurumun tarixi, quruma daha öncə başçılıq etmiş şəxslər barədə də, qurumunun fəaliyyətini təmin edən qanunverici baza, qurumun səlahiyyət çərçivələri barədə də məlumat verilmir.

2.  Ziyarətçilərin əks əlaqəsi üçün qurumun ünvanı, telefon və faks nömrəsi, e-poçt ünvanı, hətta  birbaşa əhalini qəbul edəcək rəhbər qəbul günləri və saatları verilsə də, onların telefon nömrələri saytda öz əksini tapmayıb. Quruma başqa yerlərdən getmək üçün marşrut və ictimai nəqliyyat haqqında məlumatlara da rast gəlinmir.

3.  Qurumun strukturu haqqında sxem və müavinlər haqqında mə­lumatlar saytda var. Qurumun rəhbəri və müavinləri haqda bioqrafik bilgilər təqdim edilmir. Struktur bölmələrinin səlahiyyət çərçivələri, qurumun tabeli­yindəki informasiya sistemləri haqqında məlumatlar da saytda öz əksini tapmır.

4.  Qurumun rəhbəri və ayrı-ayrı struktur bölmələrinin rəhbərləri ilə əks əlaqə imkanları haqqında bilgilər təqdim edilir. Lakin bütün mümkün struktur bölmələrinin rəhbərləri haqqında bioqrafik bilgilər yoxdur.

5.  Cari informasiyalar baxımından sayt zəngin sayıla bilər. Qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) və dövlət qurumunun həyata keçirdiyi proqram və layihələr barədə də heç bir bilgi təqdim edilmir.

6.   Qurumun büdcəsi, büdcənin  icrası haqqında,  büdcədənkənar daxil­olmalar və onların istiqamətləri barədə informasiyalar saytda olsa da, məlumatlar köhnədir. Subsidiya alanlar haqda da məlumata rast gəlmək olur.

7.  Qurumun təklif etməli olduğu mütləq və əlavə xidmətlər  haqqında da heç bir bilgi yoxdur. Burada yalnız onlayn müraciət imkanı təqdim edilir.

8.   Boş iş yerləri və işə qəbulla bağlı da informasiya var, amma 2013-cü ilə aiddir. Qurum və onun struktur böl­mələrinə işə qəbulun hüquqi bazası, işə qəbulun norma və qaydaları,  işə qəbulla bağlı komissiyalar haqqında, qurum  və onun struktur bölmələrindəki mövcud boş iş yerləri haqqında elanlar və elanların arxivi isə təqdim edilməyən bilgilər sırasındadır.

9.   Qurumun işçilərinin əmək haqları ilə bağlı heç bir məlumat verilmir.

10.  Vətəndaşların qəbulu ilə bağlı yalnız rəhbər və ayrı-ayrı vəzifəli şəxsləri tərəfindən vətəndaşların sadəcə qəbul günləri və saatları barədə bilgilər var. Burada nə vəzifəli şəxslərin əlaqə nömrələri və onlar  tərəfindən vətəndaşların qəbul norma və qaydaları, nə də qurumda vətəndaşların qəbul qaydaları haqqında bilgilər təqdim edilmir.

11.  Tender və yarışmalar haqqında hər hansı bilgiyə rast gəlinmir.

12.  Saytın texniki imkanları normal səviyyədədir. Onlayn müraciət forması təqdim olunsa da,  abunə imkanı yoxdur.