Azərbaycan Respublikası prezidentinə məxsus İnternet saytın yeni versiyası monitoringimizin nəticələrindən də göründüyü kimi ilk baxışdan zəngin resurs təsiri bağışlayır. Bununla belə Saytda “İnformasiya əldə etmək haqqında” qanunun konkret müddəaları üzrə bir sıra informasiyaların yerləşdirilməsinə ehtiyac var. Ancaq onu da xüsusi vurğulamaq yerinə düşərdi ki, Onlayn xidmətlərin varlığı və işləkliyi saytın interaktivliyi üçün yaxşı şərait yaradır. Beləliklə saytın fəaliyyətinin təkmilləşdirilməsi üçün aşağıdakıların gerçəkləşdirilməsi səmərəli olardı.
Tövsiyələr:
1. Hər şeydən öncə yaxşı olar ki, saytın hazırda mövcud olan www.president.az və www.president.gov.az ünvanları ilə bərabər www.prezident.gov.az və www.prezident.az domenləri də qeydə alınsın . Bu saytın daha əlçatım olmasını təmin edərdi .
2. Bu saytda yalnız fəaliyyətdə olan prezident haqqında deyil, ümumiyyətlə Azərbaycanda prezident institutunun qurulması və fəaliyyəti, bu vəzifəni tutanların biografiyaları, fəaliyyətləri və s. haqda bilgilərin də yer alması daha faydalı olardı.
3. Saytda telefon və faks nömrələri ilə yanaşı həm də e-poçt ünvanlarının verilməsinə ehtiyac var. Həm mətbuat xidmətinin, həm də digər xidmət və şöbələrin ən azı rəhbərlərinin, yaxud da başqa məsul şəxslərinin e-poçt ünvanları ziyarətçilərə bəlli olarsa məqsədəuyğun olardı.
4. Ayrı-ayrı şöbə və xidmət rəhbərlərinin adları, biografiyaları və qəbul vaxtları ilə bərabər onlarla birbaşa əlaqə vasitələrinin də verilməsi məqsədəuyğun olardı.
5. Prezidentin ayrı-ayrı məsələlərlə bağlı çıxışlarına keçidlər verilsə də (“prioritetlər” adı altında), təəssüf ki, onları tapıb oxumaq elə də asan deyil. Yaxşı olar ki, bu məsələdə daha konkretlik olaydı və lazımi məsələ ilə bağlı prezidentin çıxışının, yaxud da müsahibəsinin tam mətni deyil, ondan çıxarış veriləydi. Bu həm ziyarətçilərin işini asanlaşdırar, həm də saytda lazım olmadan təkrarçılığa yol verilməsinin qarşısını alardı.
6. Axtarış imkanlarının və arxivin genişləndirilməsinə ehtiyac var.
7. Statistika xarakterli bir sıra bilgilərin vaxtında yenilənməsi yaxşı olardı. Məsələn, ölkənin ərazisi, əhalisi və s. haqqında bilgiləri bura aid etmək olar. Nəzərə alınmalıdır ki, ölkənin müvafiq statistika qurumu fəaliyyət göstərir və yetərincə tez-tez də bu tip məlumatları ictimaiyyətə açıqlayır. Belə olan halda 2002-ci, yaxud da 1999-cu ilin bilgilərini sayta qoymaq prezident İnternet resursu üçün o qədər də məqsədəuyğun deyildir.
8. Prezidentə ünvanlanan məktubların arasından yalnız təşəkkür xarakterli olanlar deyil, həm də ən adi vətəndaşların ümdə problemləri ilə bağlı olanları da sayta yerləşdirməsi saytı daha oxunaqlı edərdi. Online məktubların vaxtaşırı icmalının verilməsi faydalı olardı.