“İctimai informasiyaların əldə olunması: real vəziyyət və perspektivlər” mövzusunda Dəyirmi Masa keçirilib.

posted by

21. 02 .2008

Multimedia
İnformasiya Sistemləri və Texnologiyaları
Mərkəzinin
                                                                                                                                                                                                         Məlumatı

    21 fevral   2008- ci il tarixdə Multimedia İnformasiya Sistemləri və Texnologiyaları Mərkəzi tərəfindən “İctimai informasiyaların əldə olunması: real vəziyyət və perspektivlər” mövzusunda Dəyirmi Masa keçirilib. Dəyirmi Masada İnformasiya açıqlığı sahəsində Mərkəzin EITI Koalisiyası, Milli Büdcə Qrupu və Vətəndaş Nəzarəti Şəbəkəsi ilə birgə həyata keçirdiyi Monitorinqin nəticələri açıqlanıb.
    Multimedia Mərkəzinin direktoru, Layihənin rəhbəri Osman Gündüz “İctimai informasiyaların açıqlanmasının və əldə edilməsinin monitorinqi” Layihəsinin yekunları haqqında məlumat verib. O, 3 istiqamət üzrə göndərilən informasiya sorğularının izlənilməsi və analiz edilməsi məqsədilə beynəlxalq təşkilatlar tərəfindən istifadə edilən informasiya sisteminin bu monitorinq prosesində də tətbiq edildiyini bildirib. İlkin olaraq informasiya sisteminə 69 sorğu haqqında və onların nəticələri haqqında məlumatların daxil edildiyi ( 60 sorğu dövlət qurumuna, 4 sorğu dövlət şirkətlərinə və 5 sorğu xarici neft şirkətlərinə) qeyd edilib və gələcəkdə bu sistemdən daha effektiv istifadə ediləcəyi bildirilib.
    Layihənin eksperti Ələsgər Məmmədli Layihə çərçivəsində hazırlanan “Neft gəlirləri, büdcə xərcləri və neft gəlirlərinin ətraf mühitə və sosial sahəyə təsirləri sahəsində informasiya açıqlığının monitorinqinin yekunları haqqında Hesabat”ı təqdim edib. Hesabatda 69 sorğudan yalnız 34-nün ( 49 %) cavablandırıldığı və 35-nin ( 51 %)   4 ay müddətində cavablandırılmadığı qeyd edilib. Sorğuların 6%-i qanunla müəyyən olunan vaxtda cavablandırılmış, 43% sorğu vaxtından xeyli gec cavablandırılmışdır. Cavabsız buraxılan 35 sorğunun 30-unun dövlət qurumuna və dövlətin təsis etdiyi Şirkətlərə, 5 –nin isə Neft Şirkətlərinə yönəlmiş olduğu bildirilib. 4 aylıq müddət ərzində cavablandırılan 34 sorğudan yalnız 15 sorğunun ( 22%) tam cavablandırıldığı və yetərli hesab edildiyi vurğulanıb.
     Müzakirələrdə ekspertlər Sahib Məmmədov, Qubad İbadoğlu, Azər Həsrət, sabiq millət vəkili Rizvan Cəbiyev, Turan İnformasiya Agentliyinin direktoru Mehman Əliyev, Media Hüquqları İnstitunun nümayəndəsi Xaliq Ağaəliyev, İnformasiya Alyansının nümayəndəsi Nazir Quliyev və digərləri çıxış ediblər.    Müzakirələrdə ölkədə informasiya açıqlığı sahəsində son dövrlərdə müəyyən irəliləyişlər olsa da hələlik bu sahədə normal informasiya mühitinin yaradılmadığı   qeyd olunub. Əksər ictimai informasiya subyektləri tərəfindən ictimai informasiyaların açıqlanmasına   ciddi münasibət bəslənmədiyi vurğulanıb. Müzakirələrdə vətəndaş cəmiyyətinin bu istiqamətdəki fəaliyyətinin daha da gücləndirilməsi və İnformasiya Müvəkkili institutunun formalaşması istiqamətində səylərinin artırılması tövsiyə olunub. Əldə olunmuş nəticələrin geniş dairələrə çatdırılmasının da vacibliyi qeyd olunub. .
    Dəyirmi Masada hökumət qurumlarının nümayəndələri, müstəqil ekspertlər, özəl və ictimai sektorun təmsilçiləri, beynəlxalq təşkilatların nümayəndələri iştirak edib.
     Dəyirmi Masa ACİ – Yardım Fondu tərəfindən dəstəklənən “İctimai informasiyaların açıqlanmasının və əldə edilməsinin monitorinqi” Layihəsi çərçivəsində həyata keçirilib.
    Geniş məlumat www.informasiya.org –da yerləşdirilib.

Multimedia Mərkəzi
Tel: 492 44 44 www.informasiya.org info@informasiya.org