Nizami Rayon İcra Hakimiyyəti www.nizami-ih.gov.az domen adlı İnternet saytının monitorinqinin yekunu /İCMAL/

Azərbaycan Respublikası Nizami Rayon İcra Hakimiyyəti  www.nizami-ih.gov.az ünvanlı İnternet resursunun görünüşü digər icra orqanlarının saytları kimi normaldır. Saytın istifadəsi də rahatdır. Saytda kifayət qədər məlumat olsa da, rayonun əhalisi, coğrafi mövqeyi, şura bölmələrindəki informasiyaları qənaətbəxş hesab etmək olmaz. Rayondan seçilmiş deputatlar haqqında da saytdan informasiya almaq olar. Elektron xidmətlər, eıektron müraciət, sual-cavab bölmələri boşdur. Xəbərlər bölməsi normal görünsə də, informasiyalar daim deyil ara-sıra, deyərdik ki, ayda bir dəfə yenilənir. Rayon sosial şəbəkələrə də açıq deyil.

Beləliklə, Nizami Rayon İcra Hakimiyyəti saytinın ümumi mənzərəsi belədir:

1.  Rayonun iqtisadiyyatı, təhsili, səhiyyəsi, mədəniyyəti, idmanı haqqındakı bilgilər kifayət qədərdir. Amma rayonun tarixi bölməsi, əhali və coğrafi mövqe bölmələrindəki informasiyalar isə çox azdır. Qurumun rəhbəri haqqında verilmiş məlumatları dolğun olsa da, qurumun tarixi, quruma daha öncə başçılıq etmiş şəxslər barədə məlumat, qurumunun fəaliyyətini təmin edən qanunverici baza, qurumun səlahiyyət çərçivələri barədə isə saytda məlumat verilmir.

2.  Ziyarətçilərin əks əlaqəsi üçün quruma başqa yerlərdən getmək üçün marşrut və ictimai nəqliyyat haqqında məlumatlara da rast gəlinmir. Əhalinin qəbulu üçün onun ünvanı, telefon və faks nömrəsi, e-poçt ünvanı, birbaşa əhalini qəbul edəcək rəhbər işçilərin adları, vətəndaşların qəbul saatları və qəbul günləri göstərilsə də, onlarla əlaqə  nömrələri saytda öz əksini tapmayıb.

3.  Qurumun strukturu haqqında sxem və müavinlər haqqında mə­lumatlar, onlarla əlaqə nəmrələri (sabit telefon) var. Müavinlər haqda bioqrafik bilgilər də təqdim edilir. Struktur bölmələrinin səlahiyyət çərçivələri, qurumun tabeli­yindəki informasiya sistemləri haqqında məlumatlar isə saytda öz əksini tapmır.

4.  Qurumun rəhbəri haqqında bioqrafik informasiya mövcuddur. Struktur bölmələrinin rəhbərləri ilə əks əlaqə imkanları haqqında da bilgilər təqdim edilir. Bütün mümkün struktur bölmələrinin rəhbərləri haqqında bioqrafik bilgilər isə yoxdur.

5.  Cari informasiyalar baxımından sayt elə də məlumatlı deyil. Informasiyalar daim deyil ara-sıra, deyərdik ki, ayda bir dəfə yenilənir. Qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) və dövlət qurumunun həyata keçirdiyi proqram və layihələr barədə də heç bir bilgi təqdim edilmir.

6.   Saytda qurumun büdcəsi, büdcənin  icrası haqqında,  büdcədənkənar daxil­olmalar və onların istiqamətləri, subsidiya alanlar haqda informasiyalara da rast gəlmək olmur.

7.  Qurumun təklif etməli olduğu mütləq və əlavə xidmətlər  haqqında da heç bir bilgi yoxdur. Burada yalnız onlayn müraciət imkanı təqdim edilir.

8.   Boş iş yerləri və işə qəbulla bağlı (qurum və onun struktur böl­mələrinə işə qəbulun hüquqi bazası, işə qəbulun norma və qaydaları,  işə qəbulla bağlı komissiyalar haqqında, qurum  və onun struktur bölmələrindəki mövcud boş iş yerləri haqqında elanlar və elanların arxivi) məlumatlar da təqdim edilməyən bilgilər sırasındadır.

9.   Qurumun işçilərinin əmək haqları ilə bağlı heç bir məlumat verilmir.

10.  Əhalinin qəbulu ilə bağlı rəhbər və ayrı-ayrı vəzifəli şəxsləri tərəfindən vətəndaşların qəbul günləri, qəbul saatları barədə bilgilər var. Onların əlaqə nömrələri isə yoxdur. Həm də onlar tərəfindən vətəndaşların qəbul norma və qaydaları, nə də qurumda vətəndaşların qəbul qaydaları haqqında bilgilər təqdim edilmir.

11.  Tender və yarışmalar haqqında hər hansı bilgiyə rast gəlinmir.

12.  Saytın texniki imkanları normal səviyyədədir. Onlayn müraciət forması təqdim olunsa da,  abunə imkanı yoxdur.