“Vətəndaş Cəmiyyəti İnformasiya əldə edilməsi haqqında Qanunun gerçəkləşməsi üçün nə edə bilər?» mövzusunda Dəyirmi Masa keçirilib

posted by

17.05.2006

Multimedia İnformasiya Sistemləri və Texnologiyaları Mərkəzinin
Məlumatı

17 may 2006- cı il tarixdə Multimedia İnformasiya Sistemləri və Texnologiyaları Mərkəzi tərəfindən «Vətəndaş Cəmiyyəti İnformasiya əldə edilməsi haqqında Qanunun gerçəkləşməsi üçün nə edə bilər ?» mövzusunda Dəyirmi Masa keçirilib. Dəyirmi Masa ACİ-Yardım Fondu tərəfindən dəstəklənən «Dövlət orqanlarının və Mədən sənayesində şəffaflıq təşəbbüsünə qoşulan neft şirkətlərinin informasiya açıqlığının monitorinqi və vətəndaşların informasiya hüququnun gerçəkləşməsinə dəstək» Layihəsi çərçivəsində həyata keçirilir.

Dəyirmi Masada Multimedia Mərkəzinin direktoru, Layihənin rəhbəri Osman Gündüzün və Layihənin experti Ələsgər Məmmədlinin mövzu ətrafında təqdimatları olub. Layihənin experti Azər Həsrət Dövlət orqanlarının və neft şirkətlərinin internet resurslarının monitorinqinə həsr olunan «İnformasiya Azadlığı»(www.informasiya.org ) Internet resursunu təqdim edib. Dövlət internet resurslarının analizi və reytinq cədvəli iştirakçılar tərəfindən maraqla qarşılanıb.
Dəyirmi Masada Informasiya əldə edilməsi haqqında Qanun Layihəsini hazırlayan İşçi Qrupunun rəhbəri olmuş Rizvan Cəbiyev, QHT liderləri Sahib Məmmədov, Azər Mehdiyev, RİTN-nin Hüquq şöbəsinin müdiri Bəxtiyar Məmmədov, Ombudsman aparatının nümayəndəsi Zemfira Məhərrəmli, TURAN İnformasiya Agentliyinin direktoru Mehman Əliyev, AzTV-nin «SƏHƏR» Proqramının rəhbəri Qulu Məhərrəmli və digərləri çıxış ediblər.
İnformasiya azadlığının gerçəkləşdirilməsi ilə bağlı yeni Qanunun verdiyi imkanlardan səmərəli istifadə edilməsi istiqamətində ciddi müzakirələr aparılıb. Qanunun reallaşdırılması ətrafında səmərəli Təkliflər irəli sürülüb. Qanunun icrasına ictimai nəzarət məqsədilə Qurumun yaradılması, dövlət büdcəsindən bu istiqamətdə məqsədli vəsaitlərin ayrılması, dövlət internet resurslarının müntəzəm olaraq monitorinqinin keçirilməsinin və dövlətin informasiya siyasətinin daha çevik və şəffaf qurulmasının vacibliyi istiqamətində təkliflər irəli sürülüb. Qanunvericilikdəki Yeni keyfiyyət dəyişiklikləri və açıqlanması məcburi olan informasiyalar haqqında maarifçilik işinin təşkilinə xüsusi diqqət yetirilməsi vacib hesab edilib.
Dəyirmi Masada müvafiq hökumət qurumlarının nümayəndələri, müstəqil ekspertlər, özəl və ictimai sektorun təmsilçiləri, beynəlxalq təşkilatların nümayəndələri iştirak edib.