Azərbaycan Respublikası Dövlət Torpaq və Xəritəçəkmə Komitəsinin www.dtxk.gov.az ünvanlı İnternet saytı, icmal hissədə də qeyd etdiyimiz kimi, əvvəlki illərlə müqayisədə xeyli irəli gedə bilib. Saytın daha dolğun və daha təkmil olması dərhal diqqəti cəlb edir. Üstəlik, e-xidmətlərin verilməsi də onun üstünlüklərindən biridir. Bununla belə, saytda bəzi çatışmazlıqlar da müşahidə edilməkdədir. Bu yöndə bəzi tövsiyyələrimizi təqdim edirik:
1. Qurum ilə bağlı informasiyalar yetərli sayılacaq qədərdir. Bunun üçün də əlavə bir tövsiyəyə ehtiyac duyulmur.
2. Ziyarətçilərin qurum ilə əlaqə saxlaması üçün təqdim edilmiş bilgilər sırasına quruma gəlmək üçün ictimai nəqliyyat haqqında da bilgilərin daxil edilməsi nəticəsində bu bölmə dolğunlaşmış olar.
3. Qurumun strukturu haqqında isə digər çatışmayan bilgilərin də təqdim edilməsi tövsiyə olunur. (Şəhər və rayon şöbələrinin əlaqə vasitələri və rəhbərləri ilə əlaqə).
4. Rəhbər və rəhbər işçilər, struktur bölmələrinin rəhbərləri haqqında bioqrafik bilgilər təqdim edilsə də, qurumun rəhbəri ilə əks əlaqə imkanları barədə bilgilərin təqdim edilməsi gərəklidir.
5. Qurumun cari fəaliyyəti haqqında təqdim edilən informasiyalar yetərli olduğundan əlavə bir tövsiyəyə gərək yoxdur.
6. Ümumi dövlət büdcəsinin quruma aid hissəsi göstərilsə də, onun icrası barədə bilgilərin əks etdirilməsi yaxşı olardı.
7. Qurum tərəfindən təklif edilən xidmətlər haqqında informasiyalar təqdim edilir. Lakin qaynar xəttin də göstərilməsi tövsiyə olunur.
8. İşə qəbul qaydaları və boş iş yerləri haqqında elanlar, həmçinin işə qəbulla bağlı komissiyalar haqqında bilgilər verilmişdir. Bu bölmədə heç bir tövsiyəyə ehtiyac yoxdur.
9. Sahə işçilərinin əmək haqları barədə bilgilərin verilməsi tövsiyələr sırasındadır.
10. Vətəndaşların qəbul şərtləri və qəbul günləri (saatları) barədə bilgilər təqdim edildiyi üçün əlavə tövsiyəyə ehtiyac yoxdur.
11. Tender və yarışmaların keçirilməsi ilə bağlı verilmiş qurum tərəfindən heç bir məlumat göstərilmir. Buna görə, bu sahədə bilgilərin verilməsi faydalı olardı.
12. Qurumun norma- (qanun)yaratma fəaliyyəti barədə bilgilər geniş əks etdirildiyi üçün əlavə tövsiyəyə gərək duyulmur.
13. Saytın texniki imkanları sırasına abunə imkanının da əlavə edilməsi lazımdır.