Bir sıra Azərbaycan dilli saytlara Azərbaycan ərazisindən giriş qapadılıb.

posted by

10.01.2007
Mətbuat üçün

Azərbaycan İnternet Forumunun
açıqlaması

AIF təəssüflə bildirir ki, ötən gündən etibarən bir sıra Azərbaycan dilli saytlara Azərbaycan ərazisindən giriş qapadılıb. Hazırda Azərbaycanın bütün İnternet trafikinə nəzarət edən AzərSat şirkəti www.tinsohbeti.com və www.susmayaq.biz Internet saytlarının İP ünvanlarına qanunsuz blokirovka qoyaraq, Azərbaycan İnternet seqmentindən giriş yasaqlanıb. Provayderlər bu hadisədən xəbərsiz olduqlarını bildiriblər. Qeyd olunan saytlara digər ölkələrin ərazisindən giriş sərbəstdir.

AİF bildirir ki, son bir neçə ildə, xüsusən 2002-ci ildə Azərbaycan “İnternetin düşməni” elan edildikdən sonra Azərbaycan İnternetində ciddi keyfiyyət və kəmiyyət dəyişiklikləri baş vermişdir. Bu müddət ərzində birbaşa dövlətin dəstəyi ilə AzNet-in inkişafı istiqamətində böyük layihələr həyata keçirilmiş, qiymətlər xeyli endirilmiş, milli internet resurslarının inkişafında kəskin dönüş əmələ gəlmişdir. Azərbaycan İnternetində ali hakimiyyət səviyyəsində heç bir siyasi, ideoloji və texnoloji senzura tətbiq edilməmişdir.

Lakin təəssüf ki, son yarım ildə oxşar hadisələr bir neçə dəfə baş vermişdir. AİF hansısa şirkət və dövlət məmuru səviyyəsində baş verən bu özbaşınalığı, qanunsuzluğu, məhkəmənin qərarı olmadan hər hansı İnformasiya resursunun qapadılmasını qətiyyətlə pisləyir və həmin şəxslərin dərhal məsuliyyətə cəlb edilməsini tələb edir.

Xeyli vaxtdan bəri ara verilən bu qanunsuz addımların yenidən işə salınması Azərbaycan hökumətinə başucalığı gətirmir. AİF bir daha Azərbaycan hökumətini , Rabitə və İnformasiya Texnologiyaları Nazirliyini İnternet sahəsində inhisarçılığa son qoymağa çağırır. Baş verənlərin hazırda İKT sahəsində əldə olunan ciddi uğurlara zərbə vuracağı şübhəsizdir.

AİF xatırladır ki, dövlət məmurları və özəl qurumlar tərəfindən məhkəmənin qərarı olmadan gerçəkləşdirilən bu kimi hərəkətlər sonda Azərbaycanın beynəlxalq imicini ciddi zərbə altında qoya bilər.

AİF bütün bunları söz və informasiya azadlığı, habelə, informasiya mübadiləsi sahəsində ölkə konstitusiyasının tələblərinin və beynəlxalq hüquq normalarının pozulması hesab edir, bu cür halların qarşısının alınmasını tələb edir.

AİF bəyan edir ki, hazırda ölkədə hüquqi dövlət quruculuğu prosesi gedir. Odur ki, vəzifəsindən asılı olmayaraq hər bir şəxs yalnız qanunlara tabe olmalı, hüququn üstünlüyü prinsipini hər kəs qorumalı və hansısa informasiyanın qanuna zidd olub-olmamasını müəyyənləşdirmək üçün məhkəməyə müraciət etməlidir.