Vergilər Nazirliyinin www.taxes.gov.az domen adlı rəsmi internet saytının monitorinqinin yekunu
20 iyun 2007
Vergilər Nazirliyinin www.taxes.gov.az domen adlı rəsmi internet saytının monitorinqi aparılmış, texniki və dizayn baxımından analiz edilmişdir. Aparılmış monitorinq nəticəsində məlum olmuşdur ki, sayt standart tələblərə cavab verir və normal səviyyəlidir. Bununla yanaşı bəzi çatışmayan cəhətləri vardır. Monitorinqin nəticəsi kimi aşağıdakıları qeyd etmək olar:
Vergilər Nazirliyi haqqında
1. Sayt dizayn və vergi sisteminə aid informasiya həcminə görə normal qurulmuşdur. Burada Vergi Nazirliyi və onun yaranma tarixi haqqında ətraflı məlumat verilmişdir. Ancaq bu məlumatlar çox keçidli və səs animasiyalı verilmişdir. Nəzərə almaq lazımdır ki, bu cür keçidlər və artıq animasiyalar yükləmə prosesini artırır və vaxt itkisinə səbəb olur. Bu hal özünü aşağı konfiqurasiyalı kompüterlərdə daha qabarıq göstərir.
2. Yuxarıda göstərilən hal vergi orqanının strukturu və struktur bölmələri haqqında olan məlumatlar hissəsində də özünü göstərir. Eyni zamanda burada bəzi keçidlərdə geriyə qayıdış qoyulmayıb.
3. Saytın müsbət cəhətlərindən biri də vəzifəli şəxslərin adları, soyadları, təhsil və ixtisasları eləcə də rəhbər işçilərin ünvanı, telefon və elektron poçt ünvanları barədə ətraflı məlumatların verilməsi eyni zamanda xüsusi blokda Vergilər Nazirliyinin mərkəzi aparatında rəhbər işçilərin 2007-ci ildə qəbul qrafikinin göstərilməsidir.
4. Ştat cədvəllərinə saytda rast gəlinmir.
5. Vergi Nazirliyinin və onun struktur bölmələrinin fəaliyyəti ilə bağlı hazırlanmış təlimatlar və normativ hüquqi aktlar eləcə də nazirliyin öz daxili əmr, sərancamlar və qərarlar saytda öz əksini tapmışdır. Lakin öz sahəsində dövlət sirri təşkil edən məlumatların siyahısı verilməyib.
Vergilər Nazirliyinin fəaliyyəti barədə hesabatlar. Büdcə və büdcə prognozları
Saytın Nazirliyin fəaliyyətinin işıqlandırılması hissəsini müsbət qəbul etmək olar. Belə ki, saytda orqanın cari fəaliyyəti normal əks olunub. Bundan başqa şikayət, təklif və sorğuların icmalı, informasiya infrastrukturu, informasiya sorğularının tərtib olunması, qəbulu və göndərilməsi qaydaları qoyulan tələblərə uyğun gəlir. Eyni zamanda saytda istifadəçiləri vergi məsələləri ilə bağlı maraqlandıran dövlət qanunlarına, təlimatlara geniş yer verilib. Bütün bunlarla yanaşı bəzi boşluqlara rast gəlinir.
1. Özünə aid olan informasiya resursları haqqında məlumat yoxdur.
2. Beynəlxalq müqavilələr və ya onların əsasında qəbul edilən normativ sənədlər haqqında informasiyaya rast gəlinmir.
3. Dövlət satınalmaları və tenderlər haqqında ətraflı məlumata az rast gəlinir.
4. Nazirlik tərəfdən özəl hüquqi şəxslərə və qeyri-kommersiya təşkilatlarına, büdcədənkənar fondlara dövlət büdcəsindən verilmiş vəsaitdən və ya onlara ayrılmış əmlakdan istifadəyə aid informasiya verilməyib.
5. Nazirliyə ayrılmış dövlət büdcəsinin və onun xərci barədə hesabat yoxdur.
Göstərilən xidmətlərə dair məlumatlar
1. Qeyd etmək lazımdır ki, sayt göstərilən xidmətlərə aid bölüm mövcud tələblərə cavab verir. Belə ki, Vergilər Nazirliyi tərəfindən göstərilən xidmətlərə dair məlumatlar saytda ətraflı verilmişdir və Online, İnteraktiv eləcə də forum xidmətləri təşkil olunmuşdur.
Sayta olan texniki tələbatlar 1. Saytın müxtəlif brauzerlərdə açılması və məlumatların düzgün oxunuşu təmin olunub.
2. Sayt üzrə və saytda yerləşdirilmiş məlumat bazaları üzrə axtarış sistemi və xəbərlərə abunəçilik sistemi yaradılıb.
3. Digər dövlət orqanları, habelə aidiyyatı üzrə beynəlxalq təşkilatların saytlarına keçidlər təşkil edilib.
4. Saytın xarici görünüşü, naviqasiya sistemi və istifadə rahatlığını qənaətbəxş hesab etmək olar.