Auditorlar Palatasının www.audit.gov.az domen adlı İnternet saytının monitorinqinin yekunu /İCMAL/

Azərbaycan Respublikasının Auditorlar  Palatasının www.audit.gov.az ünvanlı İnternet saytı, demək olar ki, yetərli və dolğun bilgi təqdim edir. Saytda bu sahəyə aid xidmət haqqında kifayət qədər bilgilər yer alıb. Saytın istifadəsi rahatdır. Burada sahə ilə bağlı bütün məlumatlara rast gəlmək mümkündür. Qurumun tarixi, ünvanı, ünvana gəlmək üçün marşrutlar, rəhbərlik haqqında ətraflı məlumatlar, qurumun strukturu, vətəndaşların qəbul günləri və qaydaları, dövlət qulluqçusunun etik davranışı, rəhbərliklə onlayn və telefon, faks əlaqələri, sosial şəbəkələrdə səhifələrinin olması baxımından qurumun internet resursunu yüksək dəyərləndiririk. Həmçinin, qurumun saytında Auditorlar Palatasına üzv olan auditor təşkilatları, sərbəst auditorlar və assosiativ üzvlər haqqında, bundan başqa partnyor təşkilatlardan xarici və yerli qurumlar, Palatanın üzv olduğu beynəlxalq qurumlar, AP-nin komitələri haqda ətraflı bilgi təqdim edilmişdir. Nəşrlər bölməsində auditə aid çap edilmiş kitablar təqdim edilmişdir.

Amma saytda bəzi  bölmələr boşdur ki, həmin bölmələrə də məlumatlar qoyulsa, saytı tam dolğun hesab etmək olar. Bu da Auditorlar Palatasının boş vakant yerləri ilə bağlı elanlar, sahə işçilərinin əmək haqları, rəhbər işçilərin tarif stavkası, tender və yarışmalarla bağlı elanlar, tender və yarışmaların nəticələri ilə bağlı məlumatlar, qurumun büdcəsi, büdcədənkənar daxilolmalar və onların istiqamətləri barədə informasiya ilə bağlıdır.

Beləliklə, saytın ümumi mənzərəsi isə aşağıdakı kimidir:

1. Qurumun tarixi, qurumun fəaliyyətini təmin edən qanunverici baza haqqında bilgilər yetərli səviyyədədir. Həmçinin qurumun rəhbərliyi haqda kifayət qədər dolğun bilgilər təqdim edilir. Eyni sözləri kollegiya haqqında da təqdim edilmiş bilgilər barədə demək olar.

2. Ziyarətçilərin qurum ilə əlaqə saxlaması üçün qurumun yerləşdiyi ünvan, həm ümumi xarakterli, həm də ayrı-ayrı xidmət və alt bölümlərin telefon və faks nömrələri, mümkün olan bütün e-poçt ünvanları, qurumun ünvanının marşrut və sxemi haqqında bilgi verilir. Həmçinin, quruma getmək üçün müxtəlif istiqamətlərdən gələn ictimai nəqliyyat barədə də məlumatlar öz əksini tapmışdır.

3. Qurumun strukturu barədə də lazımi bilgilər (qurumun strukturunun ümumi sxemi, aparat, struktur bölmələrinin rəhbərləri və onlarla əlaqə saxlamaq üçün imkanlar, struktur bölmələrinin dəqiq (tam) ünvanları, struktur bölmələrinin səlahiyyət çərçivələri, qurumun tabeliyindəki informasiya sistemləri  haqqında) təqdim edilmişdir.

4. Rəhbər işçilər, onlarla əks əlaqə, əsas rəhbərin bioqrafiyası, qurumun rəhbəri ilə əks əlaqə imkanları və qurum ilə əks əlaqə üçün ümumi imkanlar təqdim edilir. Rəhbərin müavinlərinin bioqrafiyaları, struktur bölmələrinin rəhbərləri haqqında bioqrafik bilgilər, ayrı-ayrı struktur bölmələrinin rəhbərləri ilə əks əlaqə imkanları də təqdim edilən məlumatlar sırasındadır.

5. Qurumun cari fəaliyyəti haqqında mətbuat üçün açıqlamalar, quruma aid olan informasiya, quruma aid olan hər cür başqa cari informasiya yetərli səviyyədədir. Bundan başqa, qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla), qurumun həyata keçirdiyi proqram və layihələr barədə də kifayət qədər bilgi göstərilir.

6. Ümumi dövlət büdcəsinin quruma aid hissəsi və onun icrası barədə məlumat təqdim olunmur.

7. Qurum tərəfindən təklif edilən mütləq xidmətlər, elektron formada təklif olunan xidmətlər, xidmətlərin keyfiyyət göstəriciləri, onlayn müraciət imkanı və xidmətlərdən istifadə qaydaları haqqında bilgi geniş əks etdirilir. Həmçinin, qurum tərəfindən təklif edilən əlavə xidmətlər də mövcuddur.

8. Dövlət qurumu və onun struktur bölmələrinə işə qəbulun hüquqi bazası, işə qəbulun norma və qaydaları, işə qəbulla bağlı komissiyalar mövcud olsa da, dövlət qurumu və onun struktur bölmələrindəki mövcud boş iş yerləri haqqında elanlar və boş iş yerləri haqqında elanların arxivi barədə bilgilər təqdim edilməyən bilgilər sırasındadır.

9. Sahə işçilərinin əmək haqları barədə də heç bir bilgi təqdim edilmir.

10. Vətəndaşların qəbul şərtləri və qəbul günləri (saatları) barədə də məlumatlar mövcuddur.

11. Daha bir əks etdirilməyən bilgi tender və yarışmaların keçirilməsi ilə bağlıdır. Qurum tərəfindən tender və yarışmaların keçirilmə qaydaları, tenderlərin keçirilməsi ilə bağlı elanlar, tender və yarışmaların nəticələri, elanların arxivi saytda öz əksini tapmamışdır.

12. Qurumun cari norma- (qanun) yaratma fəaliyyəti, bütün mümkün normativ aktların layihələri (tam mətni), bu cür layihələrin müzakirəsində vətəndaşların iştirak şərtləri, qurumun norma- (qanun)yaratma fəaliyyəti ilə bağlı arxiv haqqında bilgilər də saytda öz əksini tapmışdır.

13. Saytın texniki imkanları yaxşı dəyərləndirilir. Sosial şəbəkələrdə səhifələri mövcud olsa da, abunə imkanının və qaynar xəttin  olmaması çatışmayan cəhətlərdəndir.