Azərbaycan Respublikasının Ali Məhkəməsinin www.supremecourt.gov.az domen adlı İnternet saytının Monitorinqinin yekunu /İCMAL/

Azərbaycan Respublikasının Ali Məhkəməsinin www.supremecourt.gov.az ünvanlı İnternet saytı  ümumi götürdükdə dolğun sayıla bilər. Ali Məhkəmənin tarixi haqda hazırlanmış materialda Azərbaycan məhkəmələrinin  tarixindən başqa, strukturu, fəaliyyət istiqamətləri haqda da geniş məlumatlar mövcuddur. Saytda  e-xidmətlərin təklif olunması təqdirəlayiq haldır. Tabe qurumların, ayrı-ayrılıqda saytlarının olması, rəhbərləri, onlarla  əlaqə vasitələri və qurumların fəaliyyətini əks etdirən videosüjetlər hazırlanmışdır ki, bu da saytı zənginləşdirir. Saytda Neft diplomatiyası, Dağlıq Qarabağ münaqişəsi, Ermənistanın Azərbaycana qarşı təcavüzü,  Qarabağ tarixi, Xocalı soyqırımı, Erməni terrorizmi, 20 Yanvar hadisələri haqda məlumatlar öz əksini tapır. Ali Məhkəmənin strukturu, məhkəmə sisteminin tarixi, rəhbərliyi, vətəndaşların qəbulu, rəhbərlik haqda bioqrafik bilgilər də verilmişdir. Onlayn müraciət imkanları, KİV üçün yenilənmələr, istifadəçilər üçün məlumatlar da saytda yer alıb.

Buna baxmayaraq, bəzi sahələr üzrə bilgilərin verilməməsini də diqqətə çatdırmaq lazım gəlir. Barəsində məlumat verilməyən  sahələr isə bunlardır: qurumun büdcəsi haqqında məlumat, sahə işçilərinin əmək haqqı, tender və hərraclar haqqında heç bir bilginin olmaması, həmçinin quruma getmək üçün nəqliyyat vasitələri, boş iş yerləri haqda məlumatın olmaması çatışmayan cəhətlərdir.

Beləliklə, saytda nələri görürük:

1. Qurumun tarixi ilə bağlı informasiyalar yetərli sayılacaq qədərdir.  Qurumun rəhbərliyi, həmçinin kollegiya haqqında bioqrafik məlumatlar ətraflı təqdim olunur. Qurumun fəaliyyətini həyata keçirmək üçün qanunverici baza, əsasnamə və təlimatlar haqda bilgilər yer almışdır.

2. Ziyarətçilərin qurum ilə əlaqə saxlaması üçün dövlət qurumunun yerləşdiyi ünvan, həm ümumi xarakterli, həm də ayrı-ayrı xidmət və alt bölümlərin əlaqə vasitələri təqdim edilir. Həmçinin bütün mümkün e-poçt ünvanları da təqdim edilmişdir. Burada yalnız quruma gəlmək üçün ictimai nəqliyyat haqqında bilgilər çatışmır.

3. Qurumun strukturunun ümumi sxemi və qurumun tabeliyindəki informasiya sistemləri haqqında bilgilər tam şəkildə təqdim olunur. Digər bilgilər (aparat, qurumun alt bölmələri və regional strukturu, struktur bölmələrinin rəhbərləri və onlarla əlaqə saxlamaq üçün imkanlar, struktur bölmələrinin tam ünvanları və struktur bölmələrinin səlahiyyət çərçivələri) haqqında da yetərincə məlumatlar var.

4. Rəhbər işçilər, onlarla əks əlaqə, qurumun rəhbərinin bioqrafiyası təqdim edilir. Həmçinin, struktur bölmələrinin rəhbərləri haqqında bioqrafik bilgilər də mövcuddur.

5. Qurumun cari fəaliyyəti haqqında informasiyalar yetərli sayıla biləcək qədərdir. Bu haqda məlumatlar saytda öz əksini tapıb. Həmçinin, saytda Ali Məhkəmənin mətbuat üçün açıqlamalarının yenilənməsi də mövcuddur.

6. Ümumi dövlət büdcəsinin quruma aid hissəsi və onun icrası haqqında məlumatlara rast gəlinmir, həmçinin, qurumun sahə işçilərinin tarif stavkası ilə əlaqəli heç bir bilgi saytda əks etdirilmir.

7. Qurumun təklif etməli olduğu mütləq xidmətlər, elektron xidmətlər, onlayn müraciət imkanı və xidmətlərdən istifadə qaydaları haqqında bilgilər öz əksini tapmışdır. Çatışmayan qaynar xəttin olmamasıdır.

8. İşə qəbul qaydaları və boş iş yerləri haqqında, həmçinin  işə qəbulun norma və qaydaları barədə bilgilər təqdim edilmir.  Dövlət qurumu və onun struktur bölmələrindəki mövcud boş iş yerləri haqqında elanlar, boş iş yerləri haqqında elanların arxivi barədə də saytda bilgiyə rast gəlinmir.

9. Sahə işçilərinin əmək haqları barədə isə heç bir bilgilərə rast gəlinmir.

10. Qurumun ayrı-ayrı vəzifəli şəxsləri tərəfindən vətəndaşların qəbul günləri və saatları göstərilmişdir. Həmçinin, dövlət qulluqçusunun etika qaydaları haqqında bilgilər də saytda əks etdirilir.

11. Qurum tərəfindən tender və yarışmaların keçirilməsi ilə bağlı elanlar öz əksini tapmır. Tender və yarışmaların nəticələri, tender və yarışmaların nəticələri ilə bağlı mübahisələrin həlli qaydaları barədə  heç bir məlumat təqdim edilmir.

12. Qurumun norma  (qanun) yaratma fəaliyyəti haqqında kifayət qədər məlumatlar öz əksini tapmışdır.

13. Saytın texniki imkanları sırasında abunənin və quruma gəlmək üçün nəqliyyat marşrutunun təqdim olunmaması da diqqətdən yayınmır.  Qurumun sosial şəbəkələrdə səhifəsi olsa da, aktiv sayıla bilməz.