Azərbaycan Dəmir Yolları QSC-nin www.addy.gov.az domen adlı İnternet saytının monitorinqinin yekunu /İCMAL/

Azərbaycan Dəmir Yolları QSC-nın www.addy.gov.az ünvanlı İnternet saytı dolğun şəkildə təqdim edilməkdədir. Saytda bir sıra məsələlər üzrə e-xidmətlər də təklif olunur. Bir sıra bölmələr üzrə bilgilər tam və dolğundur.  Xüsusilə də, sərnişinlərə xidmət bölməsində elektron xidmətlər yüksək səviyyədə təqdim olunur. Qurumun saytında 2 qaynar xətt, 1 məlumat bürosu fəaliyyət göstərir. Qurumda ölkədaxili və dövlətlərarası hərəkət cədvəli, sərnişin və yükdaşımaların tarif cədvəli, mətbuat üçün açıqlamaların yenilənməsi, onlayn bilet satışı, qurumun departamentləri, Qan Yaddaşımız, Dəmirqolçu Şəhidlər bölümləri dolğunluğu ilə ziyarətçilərin diqqətini cəlb edir. Bundan başqa qurumun bütün departamentlərinin rəhbərləri ilə əlaqə nömrələri təqdim edilmişdir. Lakin quruma getmək üçün marşrut sxemi və ictimai nəqliyyat vasitələri haqda məlumata rast gəlinmir. Qurumun həyata keçirdiyi layihələr haqqında da ətraflı məlumatlar təqdim edilir. Ümumilikdə yaxşı təsir bağışlasa da, saytda bəzi bölmələr üzrə heç bir bilginin olmamasını qeyd etmək lazımdır. Saytda çatışmayan bilgilər sırasında abunə imkanının yoxluğu,  vakansiyalar haqda bilgi verilməməsi, tender və hərraclarla bağlı məlumatların köhnə tarixə aid olması, sahə işçilərinin tarif stavkası haqda neç bir məlumatın olmaması diqqətdən qaçmır. Rəhbərlik haqqında yalnız cəmiyyətin sədri barədə bioqrafik məlumatlar mövcuddur. Digər müavinlər, aparat rəhbəri, departament rəhbərləri və s. barədə bioqrafirk bilgi yoxdur.

Bütövlükdə isə saytın durumu aşağıdakı kimidir:

1. Qurum ilə bağlı təqdim edilmiş informasiyalar – qurumun tarixi, rəhbərləri haqda məlumatlar, kollegiya yarımçıq təqdim edilib. Yəni, qurumun rəhbəri haqda bioqrafik bilgi verilsə də, rəhbərin müavinləri, departament rəhbərləri haqda isə heç bir bioqrafik bilgiyə rast gəlinmir. Qurumun fəaliyyətini təmin edən qanunverici baza- əsasnamə və təlimatlar isə təqdim edilib.
2.  Ziyarətçilərin qurum ilə əlaqə saxlaması üçün ümumi imkanlar (qurumun yerləşdiyi ünvan, telefon və faks nömrələri, mümkün olan bütün e-poçt ünvanları) təqdim edilir. Burada təkcə quruma gəlmək üçün marşrut sxemi və ictimai nəqliyyat haqqında bilgilər çatışmır.
3. Qurumun struktunun ümumi sxemi və qurumun tabeliyindəki informasiya sistemləri haqqında bilgilər tam şəkildə təqdim olunur. Digər bilgilər (aparat, qurumun alt bölmələri və regional strukturu, struktur bölmələrinin rəhbərləri və onlarla əlaqə saxlamaq üçün imkanlar, struktur bölmələrinin tam ünvanları və struktur bölmələrinin səlahiyyət çərçivələri) haqqında da məlumatlar da  təqdim edilir.
4.  Rəhbər işçilər, onlarla əks əlaqə, qurumun rəhbərinin bioqrafiyası, əks -əlaqə imkanları təqdim edilir. Lakin struktur bölmələrinin rəhbərləri haqqında bioqrafik bilgilərə rast gəlinmir.
5. Qurumun cari fəaliyyəti haqqında informasiyalar yetərli sayıla biləcək qədərdir. Qurumun mətbuat üçün açıqlamaları və onların yenilənməsi qənaətbəxşdir. Azərbaycan Dəmir Yolları QSC-nın  həyata keçirdiyi proqram və layihələr haqda da bilgilər verilib.
6. Ümumi dövlət büdcəsinin quruma aid hissəsi və onun icrası haqqında məlumat ümumi qaydada verilmişdir. Sahə işçilərinin əmək haqqı barədə isə heç bir bilgi saytda əks etdirilmir.
7. Qurum tərəfindən təklif edilən mütləq xidmətlər, elektron formada təklif olunan xidmətlər, onlayn müraciət imkanı, qaynar xətt və xidmətlərdən istifadə qaydaları haqqında bilgilər öz əksini tapmışdır.  Qaynar xətt hətta bir deyil, iki nömrə ilə göstərilir. Bundan başqa, ayrıca məlumat bürosu fəaliyyət göstərir ki, bu da saytın aktivliyinin göstəricisidir.
8. İşə qəbul qaydaları və boş iş yerləri haqqında , işə qəbulun norma və qaydaları barədə natamam bilgilər təqdim edilir.  İşə qəbulla bağlı komissiyalar haqqında, dövlət qurumu və onun struktur bölmələrindəki mövcud boş iş yerləri haqqında elanlar, boş iş yerləri haqqında elanların arxivi barədə isə hər hansı bir bilgiyə rast gəlinmir.
9. Sahə işçilərinin əmək haqları barədə də heç bir bilgilərə rast gəlinmədiyini söyləmək olar.
10. Qurumun ayrı-ayrı vəzifəli şəxsləri tərəfindən vətəndaşların qəbul günləri və saatları barədə heç bir bilgiyə rast gəlmədik.  Ancaq dövlət qulluqçusunun etika qaydaları haqqında bilgilər saytda əks etdirilir.
11. Tender və yarışmaların keçirilməsi ilə bağlı bütün mümkün qayda və elanlar barədə bilgiyə rast gəlinmir. Tender və yarışmaların nəticələri, elanların arxivi, tender və yarışmaların nəticələri ilə bağlı mübahisələrin həlli qaydaları  barədə də  heç bir məlumat təqdim edilmir. Təqdim edilmiş tender elanlarının arxivi isə əvvəlki illərə aiddir.
12. Saytda təqdim edilən bilgilər sırasında  qurumun norma- (qanun) yaratma fəaliyyəti öz əksini tapıb.
13. Saytın texniki imkanları sırasında abunə imkanı yoxdur. Azərbaycan Dəmiryolları QSC-nın sosial şəbəkələrdə səhifəsi vardır. Həmçinin fasebook-dakı bu səhifə kifayət qədər aktivdir ki, bu da təqdirəlayiq haldır.