Azərbaycan Respublikasının Prezidenti yanında Dövlət Qulluğu Məsələləri üzrə Komissiyasının www.dqmk.gov.az domen adlı İnternet saytının monitorinqinin yekunu /İCMAL/

Azərbaycan Respublikasının Prezidenti yanında Dövlət Qulluğu Məsələləri üzrə Komissiyasının www.dqmk.gov.az ünvanlı İnternet saytı, bəzi bölmələri çıxsaq, demək olar ki, yetərli və dolğun bilgi verməsi baxımından diqqət çəkir. Saytda bu sahəyə aid xidmət haqqında çox geniş bilgilər yer alıb. Saytın istifadəsi rahatdır. Burada sahə ilə bağlı bütün məlumatlara rast gəlmək mümkündür. Elektron xidmətlər bölməsinin ayrıca təqdim edilməsi, qurumun tarixi, ünvanı, ünvana gəlmək üçün marşrutlar, rəhbərlik haqqında ətraflı məlumatlar, vətəndaşların qəbul günləri və qaydaları, dövlət qulluqçusunun etik davranışı, komissiya işçilərinin tarif stavkası, onlayn və telefon, faks əlaqələri, qaynar xətt, sosial şəbəkələrdə səhifələrinin olması baxımından qurumun internet resursunu yüksək qiymətləndiririk. Xüsusilə də, qurum rəhbərliyi indiyə qədər rastlaşmadığımız bir addım ataraq quruma dövlət büdcəsindən arılan vəsait, onun icrası və sahə işçilərinin əmək haqqı cədvəlini internet resursda təqdim etməklə digər qurumların saytlarını üstələyir. Saytda demək olar ki, boş bölmə yoxdur. Komissiyanın boş vakant yerləri haqda da məlumatlar təqdim edilmişdir.

Saytın ümumi mənzərəsi isə aşağıdakı kimidir:

1.    Qurumun tarixi, qurumun fəaliyyətini təmin edən qanunverici baza, qurumun rəhbərliyi haqda kifayət qədər dolğun bilgi verilir. Həmçinin kollegiya haqqında da eyni sözləri demək mümkündür.

2.  Ziyarətçilərin qurum ilə əlaqə saxlaması üçün qurumun yerləşdiyi ünvan, həm ümumi xarakterli, həm də ayrı-ayrı xidmət və alt bölümlərin telefon və faks nömrələri, mümkün olan bütün e-poçt ünvanları, qurumun ünvanının marşrut və sxemi haqqında bilgi verilir. Həmçinin, quruma getmək üçün müxtəlif istiqamətlərdən gələn ictimai nəqliyyat barədə də məlumatlar öz əksini tapmışdır.

3.    Qurumun strukturunun ümumi sxemi, aparat, struktur bölmələrinin rəhbərləri və onlarla əlaqə saxlamaq üçün imkanlar, struktur bölmələrinin dəqiq (tam) ünvanları, struktur bölmələrinin səlahiyyət çərçivələri, qurumun tabeliyindəki informasiya sistemləri  haqqında bilgilər saytda öz əksini tapmışdır.

4.    Rəhbər işçilər, onlarla əks əlaqə, əsas rəhbərin bioqrafiyası, qurumun rəhbəri ilə əks əlaqə imkanları və qurum ilə əks əlaqə üçün ümumi imkanlar təqdim edilir. Rəhbərin müavinlərinin bioqrafiyaları, struktur bölmələrinin rəhbərləri haqqında bioqrafik bilgilər, ayrı-ayrı struktur bölmələrinin rəhbərləri ilə əks əlaqə imkanları da təqdim edilən məlumatlar sırasındadır.

5.    Qurumun cari fəaliyyəti haqqında mətbuat üçün açıqlamalar, quruma aid olan informasiya, quruma aid olan hər cür başqa cari informasiya yetərli səviyyədədir. Bundan başqa, qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla), qurumun həyata keçirdiyi proqram və layihələr barədə də kifayət qədər bilgilər saytda  göstərilir.

6.    Ümumi dövlət büdcəsinin quruma aid hissəsi və onun icrası barədə saytda məlumat yer tutur.

7.    Qurum tərəfindən təklif edilən mütləq xidmətlər, elektron formada təklif olunan xidmətlər, xidmətlərin keyfiyyət göstəriciləri, onlayn müraciət imkanı və xidmətlərdən istifadə qaydaları haqqında bilgi geniş əks etdirilir. Həmçinin, qurum tərəfindən təklif edilən əlavə xidmətlər və qaynar xətt nömrəsi də mövcuddur.

8.    Dövlət qurumu və onun struktur bölmələrinə işə qəbulun hüquqi bazası, işə qəbulun norma və qaydaları, işə qəbulla bağlı komissiyalar, dövlət qurumu və onun struktur bölmələrindəki mövcud boş iş yerləri haqqında elanlar və boş iş yerləri haqqında elanların arxivi barədə bilgilər də təqdim edilən bilgilər sırasındadır.

9. Sahə işçilərinin əmək haqları barədə də kifayət qədər geniş bilgi təqdim edilir.  Digər qurumlardan fərqli olaraq ştat işçilərinin əmək haqqı cədvəli təqdim edilib.

10.  Vətəndaşların qəbul şərtləri və qəbul günləri (saatları) barədə də məlumatlar mövcuddur.

11.  Tender və yarışmaların keçirilməsi ilə bağlı qurum tərəfindən tender və yarışmaların keçirilmə qaydaları, tenderlərin keçirilməsi ilə bağlı elanlar, tender və yarışmaların nəticələri, elanların arxivi barədə bilgilər saytda öz əksini tapmışdır. Yeganə təqdim edilməyən bilgi tender və yarışmaların nəticələri ilə bağlı mübahisələrin həlli qaydalarıdır.

12.  Qurumunun cari norma- (qanun) yaratma fəaliyyəti, bütün mümkün normativ aktların layihələri (tam mətni), bu cür layihələrin müzakirəsində vətəndaşların iştirak şərtləri, qurumun norma- (qanun) yaratma fəaliyyəti ilə bağlı arxiv haqqında bilgilər də saytda öz əksini tapmışdır.

13.  Saytın texniki imkanları yaxşı dəyərləndirilir. Sosial şəbəkələrdə aktiv səhifələri mövcuddur. Çatışmayan yalnız abunə imkanıdır.