Sumqayıt şəhər İcra Hakimiyyətinin www.sumqayit-ih.gov.az domen ünvanlı rəsmi internet saytının fəaliyyətinin təkmilləşdirilməsi ile bağlı TÖVSİYELER

Sumqayıt şəhər İcra Hakimiyyətinin  www.sumqayit-ih.gov.az  domen ünvanlı rəsmi internet saytının fəaliyyətinin təkmilləşdirilməsi ilə bağlı
TÖVSİYELER

30 avqust 2007
İlk baxışdan görünür ki, Sumqayıt İcra Hakimiyyətinin  rəsmi veb-saytında xeyli  informasiya yerləşdirilsədə dövlət saytlarına qoyulan tələblərə bir o qədər də cavab vermir. Monitorinq zamanı müəyyən edilən  çatışmazlıqları aradan qaldırmaq üçün İnformasiya Azadlığının İnkişafı Koalisiyası tərəfindən bir sıra tövsiyələr hazırlanıb.

1. Xəbərlər səhifəsinin gündəlik yeniləşməsi vacibdir.

2. İşə qəbul haqda elan yoxdur. Bu çatışmazlıqları aradan qaldırmaq üçün saytda Sumqayıt İcra Hakimiyyətinin  ştat cədvəli, boş iş yerləri, işə qəbul üçün müsabiqə qaydaları, müsabiqənin yekunları haqqında məlumatlar qanunun tələblərinə uyğun olaraq yerləşdirilməlidir. Eyni zamanda yaxşı olardı ki, bu məlumatlara rəhbər işçilər haqqında  və onların vətəndaşları qəbul qaydaları haqqında məlumatlar əlavə olunaydı.

3. Saytın məlumatlar hissəsinə Sumqayıt İcra Hakimiyyətinin  əmək haqqı dərəcələri, əməyin ödənilməsinə dair təlimatlar, habelə əlavə haqların ödənilməsi qaydaları və xüsusi güzəştlər barədə məlumatlar əlavə olunsa daha faydalı olardı.

4. Yaxşı olardı ki, daxili əmr, sərəncam və qərarları haqqında da məlumatlar saytda öz əksini tapaydı.

5. Hər hansı alqı-satqı əməliyyatı haqqında, tender elanları eləcə də konkret aparılmış alqı-satqının nəticələri haqqında məlumatın saytda verilməsi yaxşı olardı.

6. Saytda beynəlxalq müqavilələrlə və ya onların əsasında gerçəkləşdirilən fəaliyyətlə bağlı informasiyalar öz əksini tapmayıb. Belə informasiyanın verilməsi daha geniş oxucu kütləsini cəlb edərdi..

7. Sual, təklif və sorğuların icmalı verilsə vətəndaşları maraqlandıran məsələnin daha tez həllinə kömək etmiş olardı.

8. Saytda xüsusi blokun ayrılması və istifadəçilərə mümkün sahələrdə interaktiv xidmət göstərilməsi faydalı olardı.

9. Əhaliyə daha effektiv xidmət etmək üçün göstərilən ictimai xidmətlər, onların qiymətləri və tarifləri haqqında məlumatlar saytda yerləşdirilsə yaxşı olardı. 

10. Yaxşı olardı ki, müxtəlif  xidmətlər, lisenziyalar, rüsumlar və onların doldurulmuş nümunələri saytda yerləşdirilsin.

11. Sayt üzrə və saytda yerləşdirilmiş məlumat  bazaları üzrə axtarış sistemin olması yaxşı olardı.

12. Saytın digər xarici dildə fəaliyyəti bərpası saytı daha da  oxunaqlı edərdi.