29.11.2007
“İnformasiya Azadlığının İnkişafı “ Koalisiyasının
Məlumatı
Lənkəran şəhər Bələdiyyəsində regional Bələdiyyələrin iştirakı ilə “Bələdiyyələrdə informasiya münasibətlərinin daha effektiv mexanizmlərinin yaradılması” mövzusunda geniş toplantı keçirilib. Toplantıda 65 qəsəbə və kənd bələdiyyələrinin nümayəndələri iştirak edib.
Tədbir Counterpart İnternational təşkilatı tərəfindən dəstəklənən “Vətəndaşların informasiya azadlığının gerçəkləşməsinə dəstək” Layihəsi çərçivəsində keçirilib.
Toplantını giriş sözü ilə Bərdə şəhər Bələdiyyəsinin sədri Eldar Hüseynov açıb. Layihənin eksperti Ələsgər Məmmədli "Bələdiyyələr ictimai informasiya sahibi" mövzusunda , Koalisiyanın üzvü, Azərbaycanda Vətəndaş Cəmiyyətinin İnkişafına Yardım Assosiasiyasının eksperti Vüqar Tofiqli "Vətəndaş və bələdiyyə münasibətləri: real vəzityyət və problemlər" mövzusunda çıxış ediblər. Lənkəran bələdiyyəsinin üzvləri Fəxrəddin Caniyev, Hafiz Mirzə, Rəfail Fərəcov və Astara Bələdiyyəsinin sədri Məmməd Məmmədov çıxış edərək vətəndaş-bələdiyyə münasibətlərinin daha çevik üsullarla qurulmasının vacibliyinə toxunublar. İnformasiya əldə edilməsi haqqında Qanunun Bələdiyyələr üzərinə qoyduğu vəzifələrin gerçəkləşdirilməsi, bələdiyyələr və vətəndaşların qarşılıqlı münasibətlərinin qurulmasında çevik və effektiv yolların tapılması ətrafında müzakirələr aparılıb. Layihə çərçivəsində Bələdiyyə üzvləri və qulluqçuları arasında keçirilən Treninqlərin əhəmiyyəti vurğulanıb və bu prosesin digər bələdiyyələr də cəlb edilməklə genişlənməsinin zəruriliyi bildirilib.
Tədbirin sonunda Lənkəran şəhər Bələdiyyəsinin Layihə çərçivəsində hazırlanan rəsmi internet saytının təqdimatı keçirilib. www.lenkeran.belediyye.az ünvanına malik olan saytda Lənkəran şəhər Bələdiyyəsi və bölgə ilə bağlı xeyli faydalı informasiya ehtiyatı yerləşdirilib.
Toplantıda regional bələdiyyələrin, icra hakimiyyətlərinin nümayəndələri və bölgənin vətəndaş cəmiyyəti subyektlərinin nümayəndələri iştirak edib.
Multimedia Mərkəzi
Tel: 492 44 44
www.informasiya.org