Göyçay Rayon İcra Hakimiyyəti www.goychay-ih.gov.az domen adlı İnternet saytının monitorinqinin yekunu /İCMAL/

Azərbaycan Respublikası Göyçay Rayon İcra Hakimiyyəti  www.goychay-ih.gov.az ünvanlı İnternet resursu normal görünüşə malikdir. Saytın istifadəsi də rahatdır. Amma saytın bəzi bölmələrindəki informasiyaları qənaətbəxş hesab etsək də, bəzi bölmələrdə informasiyanın kifayət qədər olmaması, bəzi bölmələrin isə ümumiyyətlə boş olması diqqətdən qaçmır. Xəbərlər bölməsini nisbətən normaldır, informasiyaların daim olmasa da, ara-sıra yenilənməsi diqqət çəkir. Saytın sosial şəbəkələrə çıxışı yoxdur.

Beləliklə, Göyçay Rayon İcra Hakimiyyəti saytinın ümumi mənzərəsi aşağıdakı kimidir:

1.  Rayonun tarixi, coğrafi mövqeyi, iqtisadiyyatı, səhiyyəsi, idmanı haqqındakı bilgiləri qənaətbəxş hesab etmək olar. Lakin saytda qurumun rəhbəri haqqında məlumat verilmir. Rayonun əhalisi, təhsili, mədəniyyəti, qurumun tarixi, quruma daha öncə başçılıq etmiş şəxslər barədə məlumat, qurumunun fəaliyyətini təmin edən qanunverici baza, qurumun səlahiyyət çərçivələri barədə saytda məlumat verilmir.

2.  Ziyarətçilərin əks əlaqəsi üçün qurumun ünvanı, telefon və faks nömrəsi, e-poçt ünvanı, birbaşa əhalini qəbul edəcək rəhbər işçilərin adları, telefon nömrələri (sabit telefon), vətəndaşların qəbul saatları saytda öz əksini tapıb. Amma quruma başqa yerlərdən getmək üçün marşrut və ictimai nəqliyyat haqqında məlumatlara da rast gəlinmir.

3.  Saytda qurumun strukturu haqqında sxem və müavinlərin adlrı göstərilir, onlarla əlaqə nəmrələri (sabit telefon) var. Şura bölməsindəki bilgilər siyahı tipli olsa da qənaətbəxş hesab oluna bilər.  Lakin struktur bölmələrinin səlahiyyət çərçivələri, qurumun tabeli­yindəki informasiya sistemləri haqqında məlumatlar isə saytda öz əksini tapmır.

4.  Qurumun rəhbəri haqqında saytda bioqrafik informasiya yoxdur. Struktur bölmələrinin rəhbərləri haqda da bioqrafik bilgi və onlarla əks əlaqə imkanları haqqında da bilgilər təqdim edilmir.

5.  Cari informasiyalar baxımından sayt nisbətən zəngin sayıla bilər. İnformasiyalar tez-tez yenilənir. Qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) və dövlət qurumunun həyata keçirdiyi proqram və layihələr barədə isə heç bir bilgi təqdim edilmir.

6.   Saytda qurumun büdcəsi, büdcənin  icrası haqqında,  büdcədənkənar daxil­olmalar və onların istiqamətləri haqda informasiyalara da rast gəlmədik. Subsidiya verilməsi və subsidiya  alanlar haqda da məlumat yoxdur.

7.  Qurumun təklif etməli olduğu mütləq və əlavə xidmətlər  haqqında da heç bir bilgi yoxdur. Burada yalnız onlayn müraciət imkanı təqdim edilir.

8.   Boş iş yerləri və işə qəbulla bağlı (qurum və onun struktur böl­mələrinə işə qəbulun hüquqi bazası, işə qəbulun norma və qaydaları,  işə qəbulla bağlı komissiyalar haqqında, qurum  və onun struktur bölmələrindəki mövcud boş iş yerləri haqqında elanlar və elanların arxivi) məlumatlar da təqdim edilməyən bilgilər sırasındadır.

9.   Qurumun işçilərinin əmək haqları ilə bağlı heç bir məlumat verilmir.

10.  Vətəndaşların qəbulu ilə bağlı rəhbər və ayrı-ayrı vəzifəli şəxsləri tərəfindən vətəndaşların qəbul günləri, vəzifəli şəxslərin əlaqə nömrələri (sabit telefon), qəbul saatları barədə bilgilər var. Amma onlar  tərəfindən vətəndaşların qəbul norma və qaydaları, nə də qurumda vətəndaşların qəbul qaydaları haqqında bilgilər təqdim edilmir.

11.  Tender və yarışmalar haqqında hər hansı bilgiyə rast gəlinmir.

12.  Saytın texniki imkanları normal səviyyədədir. Onlayn müraciət forması təqdim olunsa da,  abunə imkanı yoxdur.