Azərbaycan Respublikası İsmayıllı Rayon İcra Hakimiyyəti www.ismayilli-ih.gov.az İnternet resursundan rayon haqqında ətraflı və dolğun məlumat almaq mümkündür. Saytın görünüşü normal, istifadəsi də rahatdır. Xəbərlər bölməsini qənaətbəxş hesab etmək olar, informasiyaların daim yenilənməsi diqqət çəkir. Rayonun əhalisi və tarixi haqqında az məlumat verilsə də, iqtisadiyyatı, təhsili, mədəniyyəti, səhiyyəsi və idmanı haqda məlumatlar genişdir. Hətta başqa saytlarda rast gəlmədiyimiz “Kənd təsərrüfatı” bölməsi var ki, burdan kifayət qədər informasiya almaq mümkündür. Saytda olan “Büdcə” altbölməsi keçən ilə nisbətən bu il işləkdir və xeyli informasiyalılıdır. Elan bölməsi də bu il işlək. Təəssüf ki, saytın sosial şəbəkələrə çıxışı yoxdur.
Beləliklə, İsmayıllı Rayon İcra Hakimiyyəti saytinın ümumi mənzərəsi aşağıdakı kimidir:
1. Rayonun iqtisadiyyatı, təhsili, səhiyyəsi, mədəniyyəti, idmanı haqqındakı bilgilər kifayət qədərdir, qurum, qurumun rəhbəri haqqında verilmiş məlumatlar qənaətbəxş olsa da, tarixi, əhalisi haqdakı bilgilər çox azdır. Qurumun tarixi, quruma daha öncə başçılıq etmiş şəxslər barədə məlumat, qurumunun fəaliyyətini təmin edən qanunverici baza, qurumun səlahiyyət çərçivələri barədə də heç bir məlumat verilmir.
2. Əhalinin qəbulu üçün qurumun ünvanı, telefon və faks nömrəsi, e-poçt ünvanı verilr, hətta birbaşa əhalini qəbul edəcək rəhbər işçilərin telefon nömrələri (həm sabit, həm də mobil) saytda öz əksini tapıb. Quruma başqa yerlərdən getmək üçün marşrut və ictimai nəqliyyat haqqında məlumatlara isə rast gəlinmir. Amma 164- “Qaynar xətt”in olması qurumla əlaqəni asanlaşdırır.
3. Qurumun strukturu haqqında sxem və müavinlər haqqında məlumatlar, onların bəzilərinin əlaqə nömrələri saytda var. Şura bölməsindəki bilgilər isə çox azdır. Struktur bölmələrinin səlahiyyət çərçivələri, qurumun tabeliyindəki informasiya sistemləri haqqında da məlumatlar saytda öz əksini tapmır.
4. Qurumun rəhbəri və ayrı-ayrı struktur bölmələrinin rəhbərləri ilə əks əlaqə imkanları haqqında bilgilər təqdim edilir. Lakin bütün mümkün struktur bölmələrinin rəhbərləri haqqında bioqrafik bilgilər yoxdur.
5. Cari informasiyalar baxımından saytı kifayət qədər zəngin hesab etmək olar. Qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) və dövlət qurumunun həyata keçirdiyi proqram və layihələr barədə isə heç bir bilgi təqdim edilmir.
6. Saytda Büdcə bölməsi var və buradan qurumun büdcəsi, büdcənin icrası haqqında, büdcədənkənar daxilolmalar və onların istiqamətləri barədə informasiyalar almaq mümkündür.
7. Qurumun təklif etməli olduğu mütləq və əlavə xidmətlər haqqında heç bir bilgi yoxdur. Burada yalnız onlayn müraciət imkanı təqdim edilir.
8. Elan bölməsinin olmasına baxmayaraq boş iş yerləri və işə qəbulla bağlı (qurum və onun struktur bölmələrinə işə qəbulun hüquqi bazası, işə qəbulun norma və qaydaları, işə qəbulla bağlı komissiyalar haqqında, qurum və onun struktur bölmələrindəki mövcud boş iş yerləri haqqında elanlar və elanların arxivi) məlumatlar da təqdim edilməyən bilgilər sırasındadır.
9. Qurumun işçilərinin əmək haqları ilə bağlı heç bir məlumat verilmir.
10. Vətəndaşların qəbulu ilə bağlı rəhbər və ayrı-ayrı vəzifəli şəxsləri tərəfindən vətəndaşların qəbul günləri və saatları və əlaqə nömrələri (sabit və mobil telefon) barədə bilgilər var. Burada həm də vəzifəli şəxslər tərəfindən vətəndaşların qəbul norma və qaydaları, qurumda vətəndaşların qəbul qaydaları haqqında da bilgilər təqdim edilir.
11. Tender və yarışmalar haqqında hər hansı bilgiyə rast gəlinmir.
12. Saytın texniki imkanları normal səviyyədədir. Onlayn müraciət forması təqdim olunsa da, abunə imkanı yoxdur.