Azərbaycan Respublikası prezidentinin rəsmi İnternet saytının fəaliyyətinin təkmilləşdirilməsi ilə bağlı TÖVSİYƏLƏR

Azərbaycan Respublikası prezidentinin www.president.az domen ünvanlı rəsmi  İnternet resursunun informasiya  açıqlığı vəziyyətini  müəyyən etmək üçün Monitorinq aparılıb. Monitorinqin nəticələrinə əsasən  bu informasiya resursunun fəaliyyətinin təkmilləşdirilməsi üçün aşağıdakı məqamlar diqqətə alınmalıdır:

1.      Sayt “İnformasiya əldə etmək haqqında” Azərbaycan Respublikası qanununun tələblərinə uyğun qurulmalıdır;

2.      Saytda daha ayrıntılı bilgilərin yerləşdirilməsi zəruridir;

3.      Prezident hakimiyyəti ilə bağlı hüquqi əsaslar haqqında yetərli bilgi olsa da, saytda bu vəzifənin bu vaxtadək icraçıları haqqında məlumat yoxdur. Yaxşı olardı ki, ölkədə prezidentlik institutunun qurulmasından bu günə qədər bu vəzifəni icra etmiş bütün şəxslər haqqında bilgi saytda yerləşdirilsin;

4.      Qanunun tələblərinə uyğun olaraq büdcə ilə bağlı ayrıntılı bilgilərin sayta yerləşdirilməsi zəruridir;

5.      Ayrı-ayrı struktur vahidlərinin rəhbərləri ilə birbaşa əlaqə imkanlarının göstərilməməsi də saytın qüsurları sırasındadır. Yaxşı olar ki, prezident hakimiyyətinin ayrı-ayrı struktur vahidləri ilə birbaşa əlaqə imkanları saytda yer alsın;

6.      Tenderlər, ayrı-ayrı xidmətlər haqqında da bilgilərin saytda yerləşdirilməsi zəruridir;

7.      Boş iş yerləri, işə qəbul qaydaları və işə qəbulun nəticələri haqqında bilgilər də saytda gözə dəymir. Yaxşı olardı ki, belə bilgilər ziyarətçilərin ixtiyarında verilsin;

8.      Vətəndaşların qəbulu ilə bağlı qaydaların bir qədər daha ayrıntılı şəkildə verilməsinə ehtiyac var. Yəni yaxşı olardı ki, sadəcə qəbulun saat və günləri göstərilməsin, həm də müraciətlərə baxılma qaydaları, qəbuldan imtinanın əsasları haqqında bilgi verilsin;

9.      Daha bir vacib məqam isə prezident aparatına vətəndaşların rahat gələ bilməsi üçün ictimai nəqliyyat vasitələrinin marşrutlarının göstərilməsi olardı. Yəni şəhərin ayrı-ayrı əsas istiqamətlərindən buraya gələn nəqliyyat vasitələrinin nömrələri və marşrut sxemləri göstərilsə, məqsədəuyğun olardı.