Azərbaycan Respublikası Dövlət Statistika Komitəsinin www.azstat.org domen adlı İnternet saytının monitorinqinin nəticələri /İCMAL/

Azərbaycan Respublikası Dövlət Statistika Komitəsinin www.azstat.org domen ünvanlı İnternet resursu hər şeydən əvvəl özünün .gov.az zonasında olmamaqla diqqəti çəkir. Yəni belə bir vacib dövlət strukturunun hələ də nə üçün .gov.az zonasına keçmədiyi qəribə görünür. Digər tərəfdən, sayt qurumun ortaya çıxardığı nəticə-məhsulla zəngin olsa da orada komitənin özü haqqında bilgilərin xəsisliklə təqdim edilməsi başa düşülən deyil. Ən təəccüblü və qəribəsi isə odur ki, qurumun rəhbərinin adını saytda tapmaq elə də asan iş deyil. Beləliklə, Dövlət Statistika Komitəsinin İnternet resursunda gördüklərimiz aşağıdakı kimidir:

1. Qurumun özü haqqında bilgilər bölməsi üzrə komitəyə hazırda başçılıq edən və daha əvvəl başçılıq etmiş şəxslər barədə heç bir bilgi yoxdur.

2. Ayrı-ayrı xidmət və altbölümlərin telefon və faks nömrələri verilmir.

3. Qurumun ünvanının marşrut və sxemi, həmçinin şəhərin başqa-başqa istiqamətlərindən bura gəlmək üçün ictimai nəqliyyat vasitələri barədə bilgi yoxdur.

4. Qurumun strukturunun ümumi sxemi məqbul şəkildə təqdim edilir. Ancaq onun açması barədə heç nə deyilmir.

5. Rəhbər və rəhbər işçilərin nəinki biografiyaları, heç adları barədə belə bilgi verilmir.

6. Rəhbər işçilərlə ayrıca əks əlaqə imkanları da gözə dəymir.

7. Qurumun cari fəaliyyəti barədə bilgiləri yetərli hesab etmək olsa da qurumdaxili əmr və sərəncamlar haqqında bunu demək olmaz.

8. Ümumi dövlət büdcəsi və onun quruma aid hissəsi haqqında bir kəlmə olsun informasiya yoxdur.

9. İşə qəbul qaydaları barədə bilgilər yetərli səviyyədədir. Bununla belə qəbulu həyata keçirəcək mümkün komissiyalar barədə, həmçinin qurum daxilində ixtisasdəyişmə imkanları, işə qəbulla bağlı mübahisələrin həlli yolları haqqında bilgi yoxdur.

10. Qurumun təklif etdiyi xidmətlər bölməsində tamamlama işlərinə ehtiyac var.

11. Sahə işçilərinin əmək haqları barədə heç bir bilgi yoxdur.

12. Vətəndaşların qəbul qaydaları və qəbul günləri ilə bağlı da heç bir bilgi yoxdur.

13. Tender və müsabiqələrin keçirilmə qaydaları və bu haqda elanlar yoxdur.

14. Qurumun norma- (qanun)yaratma fəaliyyəti ilə bağlı da heç bir bilgi verilmir.

15. Saytın texniki imkanları elə də yüksək, hətta demək olar ki, minimal tələblərə cavab verəcək səviyyədə deyil.