Azərbaycan Respublikası Gənclər və İdman Nazirliyinin www.mys.gov.az domen adlı İnternet saytının fəaliyyətinin təkmilləşdirilməsi ilə bağlı TÖVSİYƏLƏR

Azərbaycan Respublikası Gənclər və İdman Nazirliyinin www.mys.gov.az dpmen ünvanlı İnternet resursu, gözləntilərin əksinə olaraq, heç də indiki gənclərin və idmançıların maraqlarına cavab verəcək səviyyədə deyil. Təəssüflər olsun ki, resurs alayarımçıq şəkildə təqdim edilir və tələbatlara heç orta səviyyədə də cavab vermir. Saytda müşahidə apardığımız zaman xeyli yetərsizlik nəzərimizə çarpdı ki, aşağıda onların aradan qaldırılması üçün bəzi tövsiyələrimizi təqdim etmək istərdik:

1. İndiki nazirdən öncə quruma başçılıq etmiş şəxs haqqında bilgi verilməsi məqsədəuyğun olardı.

2. Ayrı-ayrı xidmət və altbölümlərin telefon nömrələri, həmçinin nazirliyin ünvanının marşrut və sxemi zəruridir. Bundan başqa nazirliyə şəhərin ayrı-ayrı hissələrindən gəlmək üçün ictimai nəqliyyat vasitələri barədə bilgi vermək lazımdır.

3. Nazirliyin strukturu haqqında ayrıntılı bilgilərin verilməsi tələb olunandır.

4. Rəhbər işçilər haqqında ayrıntılı bilgilər, həmçinin daha geniş əks əlaqə imkanları təqdim edilməlidir.

5. Qurumdaxili əmr və sərəncamların saytda yerləşdirilməsi məqsədəuyğun olardı.

6. Ümumi dövlət büdcəsinin rəqəmlə ifadəsi və onun sahəyə aid hissəsi haqqında bilgilər verilməməsi ciddi çatışmazlıqlardan sayıla bilər.

7. Qurum tərəfindən təklif edilən xidmətlər barədə bilgilərin verilməsi də məqsədəuyğun olardı.

8. İşə qəbul qaydaları və boş iş yerləri haqqında bilgilərin verilməsi zəruridir.

9. Sahə işçilərinin əmək haqları barədə bilgi vermək lazımdır.

10. Vətəndaşların qəbul qaydaları və qəbul zamanları barədə bilgilərin yoxluğunu da, hər halda, müsbət hal kimi dəyərləndirmək olmaz.

11. Tender və müsabiqələr barədə bilgi verilməsi daha bir ciddi zərurət hesab edilir.

12. Qurumun norma- (qanun)yaratma fəaliyyəti haqqında bilgilərin verilməsi tələb olunandır.

13. Saytın texniki imkanlarını müasir tələblərə cavab verəcək səviyyədə yüksəltməyə ehtiyac var.