Dini Qurumlarla İş üzrə Dövlət Komitəsinin www.scwra.gov.az domen adlı İnternet saytının monitorinqinin nəticələri /İCMAL/

Azərbaycan Respublikası Dini Qurumlarla İş üzrə Dövlət Komitəsinin www.scwra.gov.az domen ünvanlı İnternet resursu olduqca kasıbdır. Burada da bir sıra vacib informasiyalar çatışmır. Bununla belə onu da qeyd etmək lazımdır ki, bəzi vacib bilgilər saytda təqdim edilir. Ümumi mənzərə isə bundan ibarətdir ki, sayt nəzərdə tutulan bilgilərin heç beşdə birini də əks etdirmir. Beləliklə, komitənin saytında müşahidə etdiklərimiz:

1. Qurumun özü haqqında bilgilər yetərli sayıla bilər. Burada yalnız ona daha öncə başçılıq etmiş şəxslər barədə bilgi yoxdur.

2. Ziyarətçilərin əks əlaqəsi üçün telefon və faks nömrələri, e-poçt ünvanları və onlayn forma təklif edilsə də, qurumun ünvanı haqqında hər hansı bilgi verilmir.

3. Qurumun strukturu sxemlə və ayrıntılı şəkildə təqdim edilir. Ancaq struktur bölmələrinin ünvanları və səlahiyyət çərçivələri haqqında heç nə deyilmir.

4. Əsas rəhbər və onun bir müavinin biografiyası təqdim edildiyi halda struktur bölmələri rəhbərləri haqqında bu cür bilgilər yoxdur.

5. Qurumun cari fəaliyyəti də yetərincə əks olunur. Yalnız qurumdaxili əmr və sərəncamların reyestri, həmçinin həyata keçirilən proqram və layihələr barədə bilgi yoxdur.

6. Ümumi dövlət büdcəsinin rəqəmlə ifadəsi və onun quruma aid ayrıntıları haqqında heç nə deyilmir.

7. Qurumun təklif etdiyi xidmətlər haqqında da hər hansı bilgi verilmir.

8. İşə qəbul qaydaları və boş iş yerləri haqqında hər hansı məlumata rast gəlinmir.

9. Eyni hal sahə işçilərinin əmək haqları ilə bağlı bölməyə də aiddir.

10. Vətəndaşların qəbul qaydaları və günləri barədə bilgi verilmir.

11. Qurumun elan etdiyi və həyata keçirdiyi tender və yarışmalar haqqında da bilgi yoxdur.

12. Komitənin norma- (qanun)yaratma fəaliyyəti saytda öz əksini tapmayıb.

13. Saytın texniki imkanlarına gəlincə deməliyik burada çatışmayan yalnız abunə imkanıdır.