Azərbaycan Respublikası Tarif Şurasının www.tariffcouncil.gov.az domen adlı İnternet saytının monitorinqinin nəticələri /İCMAL/

Azərbaycan Respublikası Tarif Şurasının www.tariffcouncil.gov.az domen ünvanlı İnternet resursu, belə demək mümkünsə, yarımçıq saytlar sırasına aid edilə bilər. Yəni burada bir sıra məsələlər yaxşı işıqlandırılsa da, bir o qədər bilgi də çatışmır. Ancaq onu da qeyd etmək lazımdır ki, sayt diqqət çəkəcək durumdadır. Beləliklə, Şuranın saytında müşahidə etdiklərimiz:

1. Qurumun özü haqqında bilgilər dolğun hesab edilə bilər. Burada çatışmayan yalnız ona daha öncə başçılıq etmiş şəxslər barədə bilgidir.
2. Ziyarətçilərin əks əlaqəsi üçün ünvan verilib. Ancaq bir dənə də olsun e-poçt ünvanı yoxdur. Bundan başqa qurumun ünvanının marşrut və sxemi, ora gəlmək üçün ictimai nəqliyyat vasitələri barədə bilgi yoxdur.
3. Şuranın strukturu sxem şəklində təqdim edilib. Ancaq struktur bölmələri ilə əlaqə imkanları mükəmməl deyil. Bundan başqa struktur bölmələrinin səlahiyyət çərçivələri və dəqiq ünvanları da nəzərə çarpmır.
4. Şuranın rəhbər işçilərinin biografiyaları da saytda yer alıb. Bununla belə struktur bölmələri rəhbərlərinin biografik bilgiləri nəzərə çarpmır.
5. Qurumun cari fəaliyyətinin işıqlandırılması elə də yaxşı durumda deyil. Burada çatışmayan operativlikdir. Yəni xəbərlər çox köhnədir. Üstəlik qurumun icra etdiyi proqram və layihələr barədə də bilgi yoxdur.
6. Ümumi dövlət büdcəsinin rəqəmlə ifadəsi və onun quruma aid hissəsinin ayrıntıları saytda yer almayıb.
7. Qurumun təklif etdiyi xidmətlər haqqında da heç nə deyilmir.
8. İşə qəbulla bağlı ümumi xarakterli bilgi və keçid verilsə də, boş iş yerləri və qurum daxilində ixtisasartırma imkanları barədə heç nə deyilmir.
9. Sahə işçilərinin əmək haqları barədə bilgilər saytda əks olunmur.
10. Vətəndaşların qəbulu ilə bağlı da heç nə deyilmir.
11. Tender və yarışmalar haqqında heç bir bilgi verilmir.
12. Eyni hal qurumun norma- (qanun)yaratma fəaliyyəti ilə bağlı da müşahidə olunur.
13. Saytın texniki imkanları yaxşı olsa da burada abunə yazılışı təklif edilmir.