Azərbaycan Respublikası Xarici İşlər Nazirliyinin www.mfa.gov.az domen adlı İnternet saytının fəaliyyətinin təkminləşdirilməsi ilə bağlı TÖVSİYƏLƏR

Azərbaycan Respublikası Xarici İşlər Nazirliyinin www.mfa.gov.az domen ünvanlı İnternet resursunun monitorinqinin sonucları onu deməyə əsas verir ki, bu sayt arzu olunandan qat-qat aşağı səviyyədə təşkil edilib. Bununla belə saytı tam yararsız da hesab etmək olmaz. O baxımdan resursun təkmilləşdirilməsi üçün aşağıda bloklar üzrə tövsiyələrimizi diqqətə çatdırırıq.

1. Qurumun özü haqqında bilgilər tam və dolğun hesab edildiyinə görə hər hansı tövsiyə irəli sürməyə gərək duyulmur.
2. Ziyarətçilərin əks əlaqəsini daha da uyğun bir hala gətirmək baxımından qurumun marşrut və sxemi barədə də bilgi verilməsi yaxşı olardı. Üstəlik, telefon və faks nömrələri, e-poçt ünvanları baxımından da saytı zənginləşməsinə ehtiyac var.

3. Qurumun struktur sxemini, eyni zamanda struktur bölmələri ilə əlaqə imkanları, struktur bölmələrinin başçıları haqqında minimum bilgilərin burda yer alması yaxşı olardı.

4. Burada struktur bölmələrinin rəhbərləri haqqında biografik bilgiləri, eyni zamanda nazir və onun müavinləri ilə birbaşa əks əlaqə imkanlarını əlavə etmək gərəkdir.

5. Nazirlik bir dövlət qurumu olaraq gündəlik fəaliyyət göstərdiyindən onun gündəlik informasiya istehsalı da gözlənəndir və belə informasiyaların saytda yer alması yaxşı olardı.

6. Ümumi dövlət büdcəsinin rəqəmlə ifadəsi və onun dövlət qurumuna aid hissəsinin ayrıntıları haqqında daha geniş bilgi verilməlidir. Əlavə olaraq büdcənin icra durumu, dəyişikliklər barədə də bilgi vermək lazımlı hesab olunur.

7. Yaxşı olardı ki, ümumi dövlət büdcəsinin quruma aid hissəsi (ayrıntıları ilə) və onun icrası üzrə bilgilərin saytda yerləşdirilməsi yaxşı olardı.

8. Qurum tərəfindən təklif edilən həm pulsuz, həm də pullu xidmətlər barədə bilgilərin yer alması lazımlıdır.

9. İşə qəbulla bağlı başqa gərəkli bilgilər, boş iş yerləri, işə qəbulun yekunları haqqında bilgi verilməsi yaxşı olardı.

10. Rəhbər işçilərin əmək haqları barədə bilgilər göstərilsə yaxşı olardı.

11. Hər bir vəzifəli şəxsin qəbul günləri və saatları haqqında ayrıntılı bilgi yer almalı, həm də qəbuldan imtinanın əsasları, yaxud da bu yöndə ortaya çıxan mübahisələrin həlli qaydaları göstərilməlidir.

12. Saytda qurumun özünə aid olan tender bilgilərini ayrıca təqdim edilməsi lazımlıdır.

13. Qurumun norma- (qanun)yaratma fəaliyyəti barədə də bilgi vermək lazımdır.

14. Saytın texniki imkanları sırasına abunə və onlayn müraciət imkanları da əlavə edilməlidir.

Bloklarda yer almayan daha bir məsələ ilə bağlı da tövsiyə edərdik ki, nazirliyin www.xin.gov.az domen ünvanı da yaradılsın.