Azərbaycan Respublikası Vergilər Nazirliyinin www.taxes.gov.az domen adlı İnternet saytının monitorinqinin yekunu /İCMAL/

Azərbaycan Respublikası Vergilər Nazirliyinin www.taxes.gov.az ünvanlı İnternet saytı hər zaman olduğu kimi yenə də özünün iddialılığı ilə seçilir. Son müşahidələrdən sonra saytda daha da ciddi təkmilləşdirilmə işləri aparılmış və onun zənginləşdirilməsi göz önündədir. Bundan başqa, saytın funksionallığı çox yüksək səviyyədə dəyərləndirilə bilər. Burada faktiki olaraq bu sahəylə maraqlananların tapa bilməyəcəyi bir şey yoxdur. Təbii ki, müəyyən istisnalarla. Bu isə ondan xəbər verir ki, saytın inzibatçıları və bütövlükdə vergi siyasətini həyata keçirən ən yüksək dövlət qurumu çağdaş texnologiyalardan istifadəyə gərəkli dəyəri verə bilir. Aşağıda saytın tərkibində müşahidə etdiklərimizi bölmələr üzrə təqdim edirik.

1. Qurumun özü haqqında bilgilər yetərli sayıla bilər. Ancaq daha əvvəl bu quruma başçılıq etmiş şəxslər haqqında bilgilərin olmaması qüsur sayıla bilər.

2. Ziyarətçilərin əks əlaqəsi üçün ən mükəmməl imkanlar təklif edilir və tam dolğun bilgilər verilir.

3. Qurumun strukturu haqqında da eyni fikri söyləmək olar. Quruma daxil olan ən kiçik struktur vahidi, onun səlahiyyət çərçivəsi, rəhbəri və ünvanı haqqında bilgilər verilir.

4. Rəhbər və rəhbərliyə daxil olan bütün vəzifəli şəxslər haqqında bioqrafik bilgilər verilir. Həmçinin onların qəbul vaxtları və əks əlaqə imkanları da təklif edilir.

5. Qurumun cari fəaliyyəti ən çevik şəkildə saytda əks etdirilir. Bu qəbildən olan başqa faydalı bilgilər də saytda yerləşdirilir.

6. Ümumi dövlət büdcəsinin quruma aid hissəsi ilə bağlı hər hansı bilgi yoxdur.

7. Qurum tərəfindən təklif edilən xidmətlər haqqında bilgilər ən mükəmməl şəkildə təqdim edilir. İstər elektron xidmətlər, istərsə də müxtəlif ərizə və müraciət formalarını əldə etmək mümkündür.

8. Boş iş yerləri və işə qəbul qaydaları barədə bilgilər də mükəmməlliyi ilə diqqəti cəlb edir. Lazımlı bütün bilgiləri tapmaq mümkündür.

9. Sahə işçilərinin əmək haqları barədə, təəssüf ki, saytda heç bir bilgi yoxdur.

10. Vətəndaşların qəbul şərtləri, qəbul günləri və saatları, ayrı-ayrı vəzifəli şəxslərlə əlaqə imkanları da ətraflı şəkildə təqdim edilir.

11. Tender və yarışmalarla bağlı qayda və elanlar haqqında da bilgilər əldə etmək mümkündür.

12. Qurumun norma- (qanun)yaratma fəaliyyəti ilə bağlı gərəkli bilgilər təklif edilir.

13. Saytın texniki imkanları ən yüksək səviyyədədir.