Azərbaycan Respublikası Ali Məhkəməsinin www.supremecourt.gov.az domen adlı İnternet saytının fəaliyyətinin təkmilləşdirilməsi ilə bağlı TÖVSİYƏLƏR

Azərbaycan Respublikası Ali Məhkəməsinin www.supremecourt.gov.az domen ünvanlı İnternet resursu, icmalda da qeyd etdiyimiz kimi, elə də zəngin resurs deyil. Desək ki, sayt yarımçıq və bir qədər də diqqətsiz hazırlanıb, yanılmarıq. Bununla belə hesab etmək olar ki, saytı təkmilləşdirmə imkanları da yox deyil. Ona görə də aşağıda təkmilləşdirmə ilə bağlı bəzi tövsiyələrimizi diqqətə çatdırmaq istərdik:

1. Yaxşı olardı ki, qurumun özü haqqında da ayrıntılı bilgi veriləydi.

2. Ziyarətçilərin əks əlaqəsi üçün telefon və e-poçt ünvanları ilə bərabər qurumun ünvanının marşrut və sxemi, həmçinin ora getmək üçün ictimai nəqliyyat barədə bilgi vermək lazımdır.

3. Qurumun strukturunu sxematik olaraq təsvir etməyə zərurət var.

4. Əks əlaqə imkanlarını bir qədər də təkmilləşdirib tamamlamaq gərəkdir.

5. Qurumun cari fəaliyyətini daha operativ əks etdirməyə gərək var. Üstəlik burada qurumdaxili əmr və sərəncamlar, eləcə də qurumun həyata keçirdiyi proqram və layihələr barədə bilgi vermək lazımdır.

6. Ümumi dövlət büdcəsinin rəqəmlə ifadəsi və onun quruma aid hissəsinin ayrıntılarını sayta əlavə etmək lazımdır.

7. Qurumun təklif etdiyi xidmətləri daha ayrıntılı və anlaşıqlı şəkildə təqdim etməyə gərək var.

8. İşə qəbul qaydaları və boş iş yerləri haqqında bilgiləri də əlavə etmək lazımdır.

9. Eyni fikir sahə işçilərinin əmək haqları barədə bilgilərə də aiddir.

10. Vətəndaşların qəbulu ilə bağlı informasiyaları bir qədər də konkretləşdirmək lazımdır.

11. Tender və müsabiqələr haqqında bilgi vermək işin xeyrinə olardı.

12. Qurumun norma- (qanun)yaratma fəaliyyəti ilə bağlı da eyni şeyi demək olar.

13. Saytın texniki imkanlarını yetərli saymaq üçün ən azından abunə və onlayn müraciət forması da əlavə etmək zəruridir.