Hakimiyyət mətbuatın vəziyyətini müzakirə etməyə tələsmir

Bunu Əli Həsənovun müavini deyib

“Əgər jurnalistlər görüş xahişilə dövlət başçısına müraciət ediblərsə, bu xahişə ancaq dövlət başçısı özü cavab verə bilər". Prezident Aparatı ictimai-siyasi şöbəsinin müdir müavini Nazim İsayev bu sözləri “Turan”a bir sıra jurnalist təşkilatlarının və redaktorların dövlət başçısına müraciətinin şərhində söyləyib.

N.İsayev mətbuat və cəmiyyət qarşılıqlı münasibətlərində problemlər olduğunu etiraf edib və bu məsələlərin “kompleks” müzakirəsinə ehtiyac yarandığını bildirib.

“Jurnalist və redaktorları məhkəmə iddiaları və insidentlər, cəmiyyəti isə KİV-lərdə böhtan, təhqir və şantaj narahat edir" – deyə N.İsayev qeyd edib.

Xatırladaq ki, bu günlərdə bir sıra jurnalist təşkilat və birlikləri son vaxtlar söz azadlığı ətrafında vəziyyətin pisləşməsini, habelə jurnalistlərin təqib olunmaları faktlarını hakimiyyətlə müzakirə etmək zərurəti yarandığı barədə bəyanatla çıxış ediblər.