Qiymətli Kağızlar üzrə Dövlət Komitəsinin www.scs. gov.az domen adlı İnternet saytının monitorinqinin yekunu /İCMAL/

Azərbaycan Respublikası Qiymətli Kağızlar üzrə Dövlət Komitəsinin www.scs.gov.az ünvanlı İnternet saytı dolğun şəkildə təqdim edilməkdədir. Azərbaycan Respublikası Qiymətli Kağızlar üzrə Dövlət Komitəsinin alt qurumları olan Mərkəzi Bank (www.nba.az),  Azərbaycan Respublikasının Milli Depozit Mərkəzi (www.mdm.az), Bakı Fond Birjası (www.bfb.az) saytları mövcuddur ki, həmin saytlara da komitənin saytından birbaşa keçmək mümkündür.  Saytda e-xidmətlər geniş şəkildə təklif olunur. Bu da daha geniş məlumat əldə etmək üçün yetərli sayıla bilər. Bir sıra bölmələr üzrə bilgilər tam və dolğundur. Sayt özü bütövlükdə zəngindir. İşə qəbulla bağlı ətraflı məlumat verilmişdir. Bundan başqa, attestasiyadan keçmək üçün təqdim olunan sənədlərin siyahısı, attestasiyanın nəticəsindən appelyasiya şikayət haqda məlumatlar, vakansiyalar bölməsində sahəyə tələb olunan işçinin əmək haqqının göstərilməsi təqdirəlayiq haldır. Saytda qaynar xəttin olmaması saytın operativliyini zəif göstərən haldır. Bütövlükdə isə saytın durumu aşağıdakı kimidir:

1. Qurum ilə bağlı təqdim edilmiş informasiyalar yetərli sayıla biləcək qədərdir.

 2. Ziyarətçilərin qurum ilə əlaqə saxlaması üçün ümumi imkanlar (qurumun yerləşdiyi ünvan, telefon və faks nömrələri, mümkün olan bütün e-poçt ünvanları) təqdim edilir. Burada yalnız quruma gəlmək üçün ictimai nəqliyyat haqqında bilgilər çatışmır.

 3. Qurumun strukturu haqqında qurumun strukturunun ümumi sxemi və qurumun tabeliyindəki informasiya sistemləri haqqında bilgilər tam şəkildə təqdim olunur. Digər bilgilər (aparat, qurumun alt bölmələri və regional strukturu, struktur bölmələrinin rəhbərləri və onlarla əlaqə saxlamaq üçün imkanlar, struktur bölmələrinin tam ünvanları və struktur bölmələrinin səlahiyyət çərçivələri) haqqında da məlumat təqdim edilir.

 4. Rəhbər işçilər və onlarla əks əlaqə,  qurumun rəhbərinin, onun müavinlərinin və aparat rəhbərinin bioqrafiyaları  təqdim edilir. Qurumun rəhbəri, onun müavinləri, həmçinin aparat rəhbəri ilə əks-əlaqə imkanları mövcuddur.

 5. Qurumun cari fəaliyyəti haqqında informasiyalar yetərli sayıla biləcək qədərdir.

 6. Təəssüf ki, ümumi dövlət büdcəsinin quruma aid hissəsi və onun icrası haqqında heç bir bilgi saytda əks etdirilmir.

 7. Qurum tərəfindən təklif edilən xidmətlər, elektron formada təklif olunan xidmətlər, onlayn müraciət imkanı və xidmətlərdən istifadə qaydaları haqqında bilgilər öz əksini tapmışdır.  Lakin saytın qaynar xətti yoxdur.

 8. İşə qəbul qaydaları və boş iş yerləri haqqında işə qəbulun norma və qaydaları barədə geniş bilgilər təqdim edilir.  İşə qəbulla bağlı komissiyalar haqqında, dövlət qurumu və onun struktur bölmələrindəki mövcud boş iş yerləri haqqında elanlar, boş iş yerləri haqqında elanların arxivi barədə verilən bilgilər kifayət qədər genişdir.

 9. Sahə işçilərinin əmək haqları barədə məlumata yalnız vakansiyalar bölməsində rast gəlinir. Hazırda komitədə çalışan sahə işçilərinin əmək haqqı barədə heç bir bilgiyə rast gəlinmir ki, bu da təəssüfləndirici haldır.  

 10. Qurumun ayrı-ayrı vəzifəli şəxsləri tərəfindən vətəndaşların qəbul günləri və saatları, dövlət qulluqçusunun etika qaydaları haqqında bilgilər saytda əks etdirilir.

 11. Tender və yarışmaların keçirilməsi ilə bağlı təqdim edilən bilgilər (elanlar, tender və yarışmaların nəticələri, elanların arxivi) olsa da tender və yarışmaların nəticələri ilə bağlı mübahisələrin həlli qaydaları barədə  heç bir məlumat təqdim edilmir.

12. Qurumun norma- (qanun)yaratma fəaliyyəti barədə də məlumat verilmişdir.

 13. Saytın texniki imkanları sırasında abunənin olmaması və sosial şəbəkələrdən Fasebook-da səhifəsi olsa da, boş qalması diqqətdən qaçmır. Həmçinin, sosial  şəbəkədəki səhifəyə müraciət edən vətəndaşların sualları da cavabsız buraxılmışdır.