Qubadlı Rayon İcra Hakimiyyəti www.qubadli-ih.gov.az domen adlı İnternet saytının monitorinqinin yekunu /İCMAL/

Qubadlı  Rayon İcra Hakimiyyəti  www.qubadli-ih.com domen adlı İnternet resursu  gərəkli məlumatlar baxımından digər saytlardan  qismən  zəngin hesab etmək olar. Lakin gərəkli bilgilərlə yanaşı cari informasiyaların aralıqlarla yerləşdirilməsi də diqqətdən qaçmır. Həmçinin  şəffaflıq baxımından gərəkli olan büdcə bilgiləri, tender və yarışmalar, işə qəbullla bağlı bilgilər saytda yer almamışdır.  Sayt görünüşünə görə aşağıdakı kimidir.

1.    Rayon haqqındakı tam və dolğun bilgilər saytda öz əksini tapır. Qurum haqqında verilmiş informasiyaları qənaətbəxş hesab etmək olar. Qurumun tarixi, quruma daha öncə başçılıq etmiş şəxslər barədə və qurumun əsasnaməsi haqqında bilgilər dolğunluğu ilə diqqəti çəkir.

2.    Saytda ziyarətçilərin əks əlaqəsi üçün qurumun ünvanı, telefon və faks nömrələri, e-poçt ünvanları  göstərilir. Lakin qurumunun ünvanının marşrut və sxemi, quruma başqa yerlərdən getmək üçün marşrut və ictimai nəqliyyat haqqında bilgilər təqdim edilmir.

3.    Qurumun strukturunun sxemi, qurumunun alt bölmələri, struktur bölmələrinin rəhbərləri, onlar haqqında bioqrafik məlumatlar və onlarla əlaqə saxlamaq üçün imkanlar təqdim olunsa da, struktur bölmələrinin səlahiyyət çərçivələri və struktur bölmələrinin dəqiq (tam) ünvanları barədə bilgilərdir yoxdur.

4.    Rəhbər və rəhbər işçilər haqqında verilən bilgilər sırasında icra hakimiyyətinin başçısının bioqrafiyası, struktur bölmələrinin rəhbərləri haqqında bioqrafik bilgilər,  rəhbər və ayrı-ayrı struktur bölmələrinin rəhbərləri ilə əks əlaqə imkanları, qurum ilə əks əlaqə üçün ümumi imkanlar təqdim edilir. Yəni bu bölməni yetərli saymaq olar.

5.    Cari informasiyalar baxımından saytda daimilik nəzərə çarpır. Lakin con  informasiyalar arasındakı bir aylıq fasilə diqqətdən qaçmır.  Həmçinin  qurumdaxili əmrlər, sərəncamlar, qərarlar və rayonun ictimai-siyasi qurumları, media qurumları haqqında bilgilər təqdim edilmir. Qubadlı rayonu işğal altında olduğu üçün digər saytlardan fərqli olaraq burada rayonun işğalı və milli qəhrəmanları haqqinda informasiyaların olması yaxşı olardı.

6.    Ümumi dövlət büdcəsi ilə bağlı qurumun büdcəsi, onun icrası, büdcədənkənar daxilolmalar və onların istiqamətləri barədə informasiyalar əks etdirilmir.

7.    Qurum tərəfindən təklif edilən xidmətlər sırasında ancaq onlayn müraciət imkanı yer almışdır. Saytda nə qurumunun təklif etməli olduğu mütləq və əlavə xidmətlər, nə elektron formada təklif olunan xidmətlər, nə də qaynar xətt barədə məlumat verilmir.

8.    Boş iş yerləri və işə qəbulla bağlı heç bir bilgi verilmir.

9.    Təəssüf ki, qurumun işçilərinin əmək haqları ilə bağlı heç bir məlumat yoxdur.

10.    Vətəndaşların qəbulu ilə bağlı qurumun ayrı-ayrı vəzifəli şəxsləri tərəfindən vətəndaşların qəbul günləri və saatları və dövlət qulluqçusunun etika qaydaları haqqında bilgilər saytda öz əksini tapsa da, vəzifəli şəxslər tərəfindən vətəndaşların qəbul norma və qaydaları və qurumda vətəndaşların qəbul qaydaları barədə heç bir bilgiyə rast gəlinmir.

11.    Tender və yarışmalar haqqında saytda hər hansı bir bilgi verilmir.

12.    Sayt texniki imkanlar baxımından normal sayıla bilər. Saytda onlayn müraciət forması təqdim olunsa da abunə imkanı və sayt daxilində axtarış mövcud deyil.