Ədliyə Nazirliyinin rəsmi internet saytının fəaliyyətinin təkmilləşdirilməsi ilə bağlı TÖVSİYƏLƏR

Ədliyə Nazirliyinin rəsmi internet saytının fəaliyyətinin təkmilləşdirilməsi ilə bağlı
TÖVSİYƏLƏR

14 iyun 2007
Ədliyyə Nazirliyinin www.justice.gov.az  domen adlı rəsmi internet saytında bəzi çatışmayan cəhətləri aradan qaldırmaq üçün  “İnformasiya Azadlığının İnkişafı” Koalisiyası tərəfindən bir sıra tövsiyələr edilmişdir:

1. Ədliyyə Nazirliyinin işi haqqında mükəmməl bilgi vermək üçün saytda onun strukturuna daxil olan ədliyyə orqanlarının fəaliyyəti və rəhbərləri haqqında məlumat yerləşdirilməlidir.

2. Eyni zamanda yaxşı olardı ki, nazirliyin aparatı və ona tabe olan ədliyyə orqanlarının fəaliyyəti ilə bağlı hazırlanmış təlimat və normativ hüquqi aktlar bu məlumatlar içərisində daha geniş şərh edilsin.

3. Ştat cədvəlləri və ona uyğun əmək haqları haqqında məlumatın saytda yerləşdirilməsi qanunda nəzərdə tutulduğu üçün belə bir cədvəlin verilməsi münasibdir.

4. Saytda  konkret boş iş yerləri haqqında məlumatın verilməsi savadlı kadr seçilməsi məsələsinin həllinə kömək etmiş olardı.

5. Əmr, sərəncam və qərarlar saytda nəzərdə tutulmayıb. Ancaq belə məlumatın verilməsi Ədliyyə Nazirliyinin cari fəaliyyəti haqqında dolğun təəssürat yaratmış olardı.

6. Vətəndaşları narahat edən məsələlərin həllinə daha tez nail olmaq üçün saytda şikayət, təklif və sorğuların icmalı yerləşdirilsə yaxşı olardı.

7. Saytın daha maraqlı olması və oxunaqlığını artırmaq üçün nazirliyin cari fəaliyyəti haqqında məlumatlar mütəmadi olaraq yeniləşdirilməli və aparatın geniş fəaliyyətini əhatə etməlidir.

8. Yaxşı olardı ki, informasiya sahiblərinin reyestri, özünə  aid olan informasiya  resursları saytda göstəriləydi.

9. Dövlət əmlakına ictimai nəzarəti artırmaq üçün nazirliyin balansında olan dövlət əmlakı, alqı-satqı əməliyyatı, əmlak üzərində hüquqlarının dəyişməsi barədə informasiya verilsə yaxşı olardı.

10. Kreditlər, qrantlar, onların şərtləri və istifadəsi, tenderə çıxarılacaq sahələr və onların nəticələri haqqında məlumatların verilməsi bu sahədə görülən işlərin obyektiv aparılmasını ortaya qoyardı.

11. Dövlət tərəfindən nazirliyə ayrılmış dövlət büdcəsinin uyğun istiqamətə xərclənməsi barədə hesabatların saytda yerləşdirilməsi dövlətin apardığı büdcə şəffaflığı prinsipinə əməl edilmiş olardı.

12. Kütləvi tədbirlər və onların proqramları haqqında məlumatın verilməsi həmin tədbirlərdə əhalinin yaxından iştirak etməsinə şərait yaratmış olardı.

13. Bundan başqa saytda bir sıra texniki problemlər həll edilməlidir: videoqalereya blokunda  video effekt verilməlidir, saytın ingilis dilli versiyasında boş səhifələr doldurulmalıdır, online xidməti göstərilməlidir.
.