Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun www.kivdf.gov.az domen adlı İnternet saytının monitorinqinin yekunu /İCMAL/

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət  Dəstəyi Fondunun rəsmi İnternet resursu www.kivdf.gov.az ünvanlı İnternet saytında Azərbaycan Respublikasının dövlət himni, Qarabağ, 20 Yanvar, Milli bayramlar haqda və başqa tarixi bilgilər yer alıb. Saytın istifadəsi rahatdır. Yəni saytın funksionallığı, e-xidmətlərin təqdim edilməsi diqqət çəkir. Qurumun tarixi, qurumun fəaliyyətini təmin edən qanunverici baza – əsasnamə və nizamnamə haqqında bilgilər, qurumun rəhbərləri, əsas rəhbərin bioqrafiyası, qurumun ünvanı, onlayn əlaqə forması, telefon nömrəsi, quruma getmək üçün marşrut sxemi, vətəndaşları qəbul günü və qaydaları, mətbuat üçün açıqlamalar və onların tezliyi, qurum tərəfindən təklif edilən mütləq xidmətlər, sosial şəbəkələrdən facebookda aktiv səhifəsinin olması baxımından bilgi təqdim edilir.  Bütün bunlarla bərabər, saytda hələ xeyli bilginin çatışmadığı da gözdən qaçmır. Qurumun saytında dövlət qurumuna getmək üçün ictimai nəqliyyat barədə heç bir məlumat yoxdur. İşə qəbul qaydaları, işə qəbulla bağlı elanlar, boş iş yerləri haqqında məlumata rast gəlinmir. Bundan başqa, qurumun tender elanlarına da rast gəlinmir. Tender və yarışmalarla bağlı heç bir məlumat saytda yer almır. Saytın büdcəsi, sahə işçilərinin əmək haqqı, rəhbər işçilərin tarif stavkası barədə də məlumat yoxdur.

Qurumun saytının ümumi mənzərəsi isə aşağıdakı kimidir:

1. Qurumun tarixi, qurumun fəaliyyətini təmin edən qanunverici baza -əsasnamə, nizamnamə  və kollegiya haqqında bilgilər yetərli səviyyədədir. Qurumun rəhbərlərindən yalnız  rəhbər haqqında bioqrafik bilgi verilir.

2. Ziyarətçilərin qurum ilə əlaqə saxlaması üçün qurumun yerləşdiyi ünvan, həm ümumi xarakterli telefon və faks nömrələri, mümkün olan bütün e-poçt ünvanları haqqında məlumat verilir. Qurumun ünvanının marşrut və sxemi təqdim edilsə də, quruma getmək üçün müxtəlif istiqamətlərdən gələn ictimai nəqliyyat barədə bilgi yoxdur.

3. Qurumun strukturunun ümumi sxemi, qurumun alt bölmələri və regional strukturu, struktur bölmələrinin dəqiq (tam) ünvanları, struktur bölmələrinin səlahiyyət çərçivələri və qurumun tabeliyindəki informasiya sistemləri haqında heç bir bilgi saytda yer almamışdır. Burada yalnız müşahidə Şurası haqqında qısa məlumat mövcuddur.

4. Rəhbər işçilər, onlarla əks əlaqə, əsas rəhbərin bioqrafiyası, qurumun rəhbəri ilə əks əlaqə imkanları və qurum ilə əks əlaqə üçün ümumi imkanlar təqdim edilir. Əsas rəhbərin bioqrafiyası təqdim edilsə də, onun  müavinlərinin bioqrafiyaları, struktur bölmələrinin rəhbərləri haqqında bioqrafik bilgilər, ayrı-ayrı struktur bölmələrinin rəhbərləri ilə əks əlaqə imkanları təqdim edilmir.

5. Qurumun cari fəaliyyəti haqqında məlumatlar, mətbuat üçün açıqlamalar və onların yenilənməsi yetərli səviyyədədir. Ancaq qurumdaxili əmr və qərarlar, bu cür aktların reyestri (qəbul və qüvvəyə minmə tarixi də daxil olmaqla) barədə məlumata rast gəlinmir. Qurumun həyata keçirdiyi proqram və layihələr barədə bilgi təqdim olunur.

6. Ümumi dövlət büdcəsinin quruma aid hissəsi və onun icrası barədə saytda bilgilərə rast gəlinmir. Həmçinin, büdcədənkənar daxilolmalar haqda da heç bir məlumat verilmir.

7. Qurum tərəfindən təklif edilən xidmətlər, elektron formada təklif olunan xidmətlər, xidmətlərin keyfiyyət göstəriciləri, onlayn müraciət imkanı və xidmətlərdən istifadə qaydaları haqqında bilgi əks etdirilir. Çatışmayan yalnız qurum tərəfindən təklif edilən  qaynar xətt nömrəsidir.

8. Dövlət qurumu və onun struktur bölmələrinə işə qəbulun hüquqi bazası, işə qəbulun norma və qaydaları, işə qəbulla bağlı komissiyalar, dövlət qurumu və onun struktur bölmələrindəki mövcud boş iş yerləri haqqında elanlar və boş iş yerləri haqqında elanların arxivi barədə bilgilər təqdim edilmir.

9. Növbəti təqdim edilməyən bilgi sahə işçilərinin əmək haqları barədə olan bilgilərdir.

10. Vətəndaşların qəbul şərtləri və qəbul günləri (saatları) barədə yetərli səviyyədə məlumat verilir.

11. Daha bir əks etdirilməyən bilgilər tender və yarışmaların keçirilməsi ilə bağlıdır. Qurum tərəfindən tender və yarışmaların keçirilmə qaydaları, tenderlərin keçirilməsi ilə bağlı elanlar, tender və yarışmaların nəticələri, elanların arxivi, tender və yarışmaların nəticələri ilə bağlı mübahisələrin həlli qaydaları haqda heç bir məlumat təqdim olunmur.

12. Qurumunun norma- (qanun) yaratma fəaliyyəti, bütün mümkün normativ aktların layihələri (tam mətni), bu cür layihələrin müzakirəsində vətəndaşların iştirak şərtləri, qurumun norma- (qanun) yaratma fəaliyyəti ilə bağlı arxiv haqqında bilgilər saytda öz əksini tapmışdır.

13. Saytın texniki imkanları yaxşı dəyərləndirilir. Saytın sosial şəbəkələrdəki səhifəsi kifayət qədər aktivdir. Burada yalnız abunə imkanı çatışmır.