www.dyp.gov.az – Azərbaycan Respublikası Daxili İşlər Nazirliyi Baş Dövlət Yol Polisi İdarəsinin İnternet saytının monitoringinin nəticələri

www.dyp.gov.az – Azərbaycan Respublikası Daxili İşlər Nazirliyi Baş Dövlət Yol Polisi İdarəsinin İnternet saytının monitoringinin nəticələri

Azərbaycan Respublikası Daxili İşlər Nazirliyi Baş Dövlət Yol Polisi İdarəsinin (BDYP) İnternet saytı ana səhifədə əsas sol menyu, yuxarıda abunə və sual-cavab səhifələrinə keçid, əsas menyunun altında axtarış qutusu, sağda son (əslində köhnəlmiş) xəbərlərdən başlıqlar, yol nişanları, yol hərəkəti ilə bağlı şüar və aşağıda qurumun telefon, faks nömrələri və e-poçt ünvanı ilə açılır.
BDYP-nin ayrı-ayrı struktur bölmələri və vəzifəli şəxsləri haqqında heç bir bilgi yoxdur. Bundan başqa ana səhifədəki telefon, faks nömrələri və e-poçt ünvanından, eləcə də sual-cavab formasından başqa hər hansı əks əlaqə vəsitəsi və ya vəzifəli şəxs haqqında bilgi verilmir. Ümumilikdə isə sol menyu aşağıdakı bölmələri və onların tərkibini ehtiva edir:

• Ümumi məlumat – dövlət yol polisinin tarixi, dövlət yol polisinin əsas vəzifələri
• Qanunvericilik – “Polis haqqında” qanun, “Yol hərəkəti haqqında“ qanun, “Azərbaycan Respublikasının İnzibati Xətalar Məcəlləsi”, “Avtomobil yolları haqqında“ qanun, "Nəqliyyat haqqında" qanun, "Nəqliyyat vasitəsi sahiblərinin mülki məsuliyyətinin icbari sığortası haqqında" qanun, Yol hərəkəti təhlükəsizliyi üzrə Azərbaycan Respublikasının 2002-2005-ci illər üçün Dövlət Proqramı
• Sürücülər üçün – sürücünün vəzifələri, nəqliyyat vasitələrinin texniki vəziyyəti və onların texniki baxışdan keçirilməsi, yol hərəkəti qaydaları, nəqliyyat vasitəsinin idarə olunmasından kənarlaşdırma və sərxoşluq vəziyyətinin müayinəsi, nəqliyyat vasitələrinin saxlanılması, nəqliyyat vasitələrinin istismarının qadagan edilməsi
• Piyadalar üçün – piyadanın vəzifələri, piyadanın məsuliyyəti
• Yol-nəqliyyat hadisələri – 1988-2006-cı illər arzində baş vermiş yol-nəqliyyat hadisələrinin qısa müqayisəli təhlili
• Respublikanın avtomobil yolları – “Avtomobil yolları haqqında” qanun, avtomobil yollarının şəbəkəsi barədə məlumat, yolların xəritəsi
• Sənədlər – yol nişanları, surucünün sənədləri, sürücülük vəsiqəsi, nömrə nişanlarının kodları, nəqliyyat vasitələrinin qeydiyyat nişanlari, dövlət yol polisinin stasionar postları, DYP-nin göstərdiyi xidmətlər, qeydiyyat-imtahan məntəqələri
• Kitablar və məqalələr – yol polisi işçilərinin kitab və məqalələri (“Yol hərəkəti əlifbası”, “Yol hərəkəti qaydaları”, “Yol hərəkətinin beynəlxalq hüquqi tənzimlənməsi və milli qanunvericilik”, “Yol hərəkəti qaydaları”, “Avtonəqliyyat vasitələri haqqında ümumi məlumat”, “Müasir beynəlxalq nəqliyyat hüququnun Azərbaycanda tətbiqi”, “Ümumtəhsil məktəblərində şagirdlərə təhlükəsiz davranma qaydalarının öyrədilməsinə dair materiallar”, “Piyada hərəkət iştirakçısıdır” (ümumtəhsil məktəbləri üçün tədris vəsaiti), “Müasir beynəlxalq iqtisadi münasibətlərdə istifadə edilən 700 termin”, “Qloballaşma dövründə beynəlxalq nəqliyyat vasitələri”, “Sevgi ürək yaraşığı” (yol hərəkətinə dəxli yoxdur))
• Axtarılan nəqliyyat vasitələri – 2005-2006-cı illər ərzində oğurlanmış, qaçırılmış nəqliyyat vasitələri barədə məlumat
• Fotoalbom – tarix, yol hərəkəti qaydaları və uşaqlar, fəaliyyəti nəqliyyatla bağlı olan təşkilatlarda görüşlər, texniki baxış, ümumi, rəsm müsabiqəsi, yol-nəqliyyat hadisələri

Göründüyü kimi yol hərəkətinin iştirakçıları üçün qanunvericilik və qaydalarla bağlı yetərincə bilgi verilsə də sayt müvafiq standart və tələbatlara uyğun sayıla bilməz. Saytda ziyarətçilərin marağına səbəb olmaqla bərabər “İnformasiya əldə etmək haqqında” qanunun tələblərindən irəli gələn bir çox məqamlar yer almayıb.
Məsələn, yuxarıda da qeyd edildiyi kimi, qurumun strukturu, ayrı-ayrı vəzifəli şəxsləri, ayrı-ayrı xidmətlər, müxtəlif məsələlərlə bağlı müraciət etmək üçün telefon və ya başqa əlaqə vasitələri haqqında bilgi verilməyib.
İşə qəbul qaydaları, boş iş yerləri haqqında elanlar, tenderlər haqqında da heç bir bilgi nəzərə çarpmır.
BDYP-nin büdcəsi, onun xərclənməsi, sərəncamında olan avadanlıqlar və göstərdiyi xidmətlərdən əldə edilən gəlirlər haqqında da məlumat yoxdur.
Mövcud məlumatların bəziləri isə köhnəlib və uzun müddətdir yenilənməyə ehtiyac duyur. Buraya ölkədəki nəqliyyat vasitələrinin sayı haqqında məlumatları və gündəlik fəaliyyətlə bağlı açıqlamaları da aid etmək olar. Başqa bir çatışmazlıq isə saytın geniş yayılmış xarici dillərdən heç birində olmamasıdır. Daha bir qüsur isə terminologiyadan düzgün istifadə edilməməsində özünü göstərir.
Məsələn, “Bakı şəhərinin magistral yolları” kimi söz birləşməsi bu qəbildəndir. Bəlli məsələdir ki, Bakı şəhərində və onun ətrafında heç bir magistral yol yoxdur. Bir məqamı da qeyd etmək lazımdır ki, saytda qurumun adı Baş Dövlət Yol Polisi İdarəsi kimi göstərilsə də onun domen adı yalnız “dövlət yol polisi”ni (dyp.gov.az) ehtiva edir ki, bu da düzgün deyildir.

Saytın ziyarətindən sonra gəlinən ümumi qənaət bundan ibarətdir ki, BDYP-nin İnternet saytı standartlara uyğun gəlməməklə bərabər bir sıra çatışmazlıqlarla zəngindir.

Saytın  fəaliyyətinin təkmilləşdirilməsi  üçün “İnformasiya Azadlığının İnkişafı” Koalisiyası tərəfindən Tövsiyələr  hazırlanıb