Dövlət Neft Fondunun www.oilfund.az domen adlı rəsmi internet saytının fəaliyyətinin təkmilləşdirilməsi ilə bağlı TÖVSİYƏLƏR

Dövlət Neft Fondunun WWW.OILFUND.AZ  domen adlı rəsmi internet saytının fəaliyyətinin təkmilləşdirilməsi ilə bağlı
TÖVSİYƏLƏR
28 sentyabr 2007

Dövlət Neft Fondunun WWW.OILFUND.AZ  domen adlı rəsmi internet saytının monitorinqin nəticələrinə əsasən belə qənaətə  gəlmək olar ki, sayt dizayn, struktur cəhətdən normal tərtib olunsa da informasiya  cəhətdən bir  sıra çatışmazlıqlar  var.
Mövcud  qanunvericiliyə uyğun olaraq  saytın fəaliyyətinin təkmilləşdirilməsi üçün monitoring qrupu aşağıdakı tövsiyələri hazırlayıb:

1. Saytın xəbərlər səhifəsində yerləşdirilən xəbərlər daha aktual olmalı və vaxtaşırı yeniləşməlidir. Mətbuat xəbərləri 20.07.2007 il tarixə təsadüf edir. Yaxşı olar ki, belə məlumatlar mütəmadi yeniləşsin.

2. Ştat cədvəli və smeta xərcləri haqqında məlumat, rəhbər işçilərin qəbul saatları barədə məlumatlar və vətəndaşların qəbul  qaydaları saytda öz əksini tapmalıdır.

3. Saytda Dövlət Neft  Fondunun öz daxili əmr, sərəncam və qərarları haqqında  məlumatlara rast gəlinmir. 

4. ARDNF-nun vəsaitləri ilə  bağlı (yerləşdirildiyi  banklar, əldə olunan gəlirlər və s),  eyni zamanda bu vəsaitlər hesabına görülən işlərlə (regionların sosial-iqtisadi inkişafı, sosial-iqtisadi vəziyyətin yaxşılaşdırılması və s. )  bağlı daha geniş  və əhatəli informasiyalar sayta yerləşdirilməlidir.

5. Saytda qüvvədə olan əmək haqqı dərəcələri, əməyin ödənilməsinə dair təlimatlar, habelə əlavə haqların ödənilməsi qaydaları və xüsusi güzəştlər barədə məlumatlara  rast gəlinmir. Bunu nəzərə alaraq qüvvədə olan əmək haqqı dərəcələri, əməyin ödənilməsinə dair təlimatlar barədə məlumatlar və daxili normativ sənədlər olmalıdır.

6. Hər hansı alqı-satqı əməliyyatı, satınalmaların şərtləri, nəticəsi, eləcə də dövlət əmlakının satılması, onun üzərində əmlak hüquqlarının dəyişməsi barədə məlumatlar yoxdur. Bundan başqa təklif olunan kreditlər, qrantlar, onların şərtləri və istifadəsi, müqavilələr, auksionlar, tenderə çıxarılacaq sahələr və onların nəticələri haqqında məlumatlar saytda öz yerini tapmamışdır. Bu məsələlər öz həllini tapmalıdır.

7. Şikayət, təklif və sorğuların icmalı yerləşdirilməlidir.

8. Bundan başqa İnteraktiv (vətəndaşlarla əlaqə və s) xidmətlərin olması üçün texniki yeniləşmə edilməlidir

9. Fondun aparatının formalaşdırılması, Aparat üçün inzibati binanın alınması və təmiri, bu məqsədlər üçün dövlət büdcəsindən maliyyə vəsaitlərinin ayrılması haqda məlumatlar göstərilməlidir.