Bakı Şəhər İcra Hakimiyyətinə məxsus www.bakucity.az ünvanındakı İnternet resursunun təkmilləşdirilməsi ilə bağlı tövsiyələr

Bakı Şəhər İcra Hakimiyyətinin www.bakucity.az domen ünvanlı İnternet saytında apardığımız monitoring bu qurumun müasir İKT-nin imkanlarına yetərincə əhəmiyyət vermədiyini ortaya çıxardı. Saytda bir çox ən adi informasiyanın yoxluğu onu deməyə əsas verir ki, bu qurum öz resursunu bir informasiya mənbəyi olaraq ciddi  diqqət  yetirmir. Burada yerləşdirilən informasiyaların demək olar ki, əkəsəriyyəti də yetərincə dolğun sayıla bilməz. Elə bizim apardığımız monitoring zamanı (10 fevral 2008) ən son xəbərin 20 gün əvvələ aid olması da deyilənləri təsdiq edən amillərdən sayıla bilər. Buna baxmayaraq mövcud resursu baza hesab etməklə onun üzərində iş aparıb fəaliyyətini təkmilləşdirməyin mümkünlüyünü nəzərə almaqla bəzi tövsiyələrimizi dilə gətirmək istərdik:

1. Saytın domen ünvanı ilə bağlı təklif edərdik ki, bu, indiki kimi deyil, məsələn, www.baku.gov.az kimi olarsa daha məqsədəuyğun olardı. Xüsusən də Bakının 2016-ci il yay olimpiya oyunlarına ev sahibliyi etmək istədiyini nəzərə alsaq, bu  xüsusilə  əhəmiyyət kəsb edir.

2. Saytın ana səhifəsində qurumun ictimai əlaqələrə məsul olan şəxsi, və ya struktur bölməsi ilə əlaqə vasitələrinin göstərilməsi məqsədəuyğun olardı. Halbuki saytda BŞİH-də belə bir vəzifənin olub-olmadığı haqqında bir kəlmə belə yoxdur.

3. Saytın arxivinin yaradılması, axtarış və abunə imkanlarının yaradılması da artan tələbatı təmin etməkdə çox ciddi rol oynaya bilərdi.

4. Dövlət büdcəsindən BŞİH-ə ayrılan vəsaitlər, eyni zamanda büdcədənkənar vəsaitlər barədə bilgilərin yerləşdirilməsi də qanunun tələblərindən irəli gəldiyi üçün burada yer almalıdır.

5. Şəhərin təsərrüfat fəaliyyətinin ayrı-ayrı istiqamətləri barədə də bilgilərin olması günün tələbləri sırasındadır. Məsələn, yolların təmiri, körpü və keçidlərin tikilməsi, tikinti-təmir işlərinin gedişi haqqında gündəlik, bəlkə də saatbasaat yenilənən bilgilər bu saytı xeyli oxunaqlı  və maraqlı edə bilərdi.

6. Saytda ayrıca qanunvericilik bölməsi yaratmaq da zəruridir. Yəni burada BŞİH-in fəaliyyətini tənzimləyən sənədlərin tam əks olunması onun səlahiyyət dairəsini müəyyən etməkdə ziyarətçilərə yardımçı olardı.

7. Ayrı-ayrı dövlət qurumlarının saytlarına keçidlər, Bakının tərkibinə daxil olan rayonlar barədə bilgilərə də ehtiyac var.

8. Ərazi və əhali baxımından bilgilərin daha da genişləndirilməsinə, şəhərin tarixinə geniş yanaşmaya zərurət də ehtiyaclar sırasındadır.

9. Bütün deyilənlərlə bərabər saytın ciddi olaraq “İnformasiya əldə etmək haqında” qanunun tələblərinə uyğunlaşdırılması zəruridir.