Dövlət Əmlakının İdarə Edilməsi üzrə Dövlət Komitəsinə məxsus www.stateproperty.gov.az ünvanındakı İnternet resursunun təkmilləşdirilməsi ilə bağlı tövsiyələr

Apardığımız monitoringin nəticəsinə görə demək olar ki, Dövlət Əmlakının İdarə Edilməsi üzrə Dövlət Komitəsinə məxsus İnternet saytı hətta minimal tələblərə belə cavab vermir. Sayt olduqca zəif təsir bağışlayır. Üstəlik bəlli bir sistemsizlik də mövcuddur. Ən təəccüblü məqam isə ondan ibarətdir ki, saytda qurumun heç bir vəzifəli şəxsi haqqında bilgi yoxdur. Bundan başqa bir açıq telefon nömrəsi və ümumi telefon və faks nömrələri yetərli sayıla bilməz. Bütün bunlara aşağıdakı bəzi tövsiyələrimizdə yer verəcəyik.

1. Hər şeydən öncə demək istərdik ki, saytın domen adı Azərbaycan dilli ziyarətçiyə heç nə demir: stateproperty. Halbuki qurumun xalq arasında geniş yayılan adı – DƏK – domen adı üçün də olduqca uğurlu sayıla bilər: www.dek.gov.az.

2. Qurumun haqqında informasiyanın olmaması da təəccüb doğurur. Adətən bütün İnternet saytlarında onlara sahib olan qurumların haqqında az və ya çox bilgi olur. Ancaq bu saytda nəsə həmin bilgiyə rast gəlinmir.

3. Daha maraqlı və təəccüblü bir məqam da qurumun heç bir vəzifəli şəxsi haqqında saytda bilgi verilməməsidir. Yəqin ki, bu qurum ciddi gizlilik şəraitində deyil, əksinə şəffaf və açıq şəkildə fəaliyyət göstərməlidir. Belə olan halda onun vəzifəli şəxsləri barədə bilgilərin verilməsi zəruridir.

4. Diqqət mərkəzində olan bir qurum kimi bu komitənin işə qəbul qaydaları və boş iş yerləri haqqında da bilgilərin ayrıca verilməsinə gərək var.

5. Qurumun büdcəsi, onun icrası haqqında da bilgilərin gözə dəyməməsi təəssüf doğurmaqla bərabər qanunun daha bir tələbinin icra edilməməsinin göstəricisidir.

Əslinə qalanda bu saytla bağlı ayrıntılı tövsiyələr verməyə elə də gərək yoxdur. Bununla belə bəzi tövsiyələri dilə gətirməklə birlikdə son olaraq qeyd etmək istərdik ki, saytı dolğun və sistemli bir şəkildə hazırlayıb istifadəyə vermək səmərəli olardı