Azərbaycan Respublikası İqtisadi İnkişaf Nazirliyinin www.economy.gov.az domen adlı İnternet saytının monitorinqinin nəticələri /İCMAL/

Azərbaycan Respublikası İqtisadi İnkişaf Nazirliyinin www.economy.gov.az domen ünvanlı İnternet resursunun monitorinqinin nəticələri göstərir ki  sayt İnformasiya əldə edilməsi haqqında Qanuna əsasən bizim əsaslandığımız parametrlərin böyük əksəriyyəti bu saytda əks olunmayıb və bu baxımdan qiymətləndirmə cədvəlimiz sıfırlarlar zəngingir. Saytın texniki imkanlarını da yüksək dəyərləndirmək olmaz. Burada heç adi abunə imkanı da gözə dəymir. Ümumilikdə isə saytda müşahidə etdiklərimiz aşağıdakılardan ibarətdir:

1. Qurulduğu gündən bu günə qədər nazirliyə başçılıq edənlər barədə bilgi yoxdur. Yalnız hazırkı nazirin biografiyası verilib.

2. Saytda cəmi bir ümumi xarakterli e-poçt ünvanı verilib. Ayrı-ayrı struktur bölmələri, hətta mətbuat xidməti ilə əlaqə imkanları göstərilməyib.

3. Qurumun yerləşdiyi ünvan verilsə də onun sxemi göstərilməyib. Bundan başqa ora getmək üçün şəhərin müxtəlif istiqamətlərindən ictimai nəqliyyat barədə bilgi yoxdur.

4. Struktur bölmələrinin səlahiyyət çərçivələri və onların ünvanları barədə də bilgi yoxdur.

5. Nazirdən başqa heç bir vəzifəli şəxs barədə biografik bilgilər saytda yer almayıb.

6. Bundan əlavə struktur bölmələri ilə əks əlaqə imkanları da nəzərə çarpmır.

7. Qurumun cari fəaliyyəti barədə bilgiləri yetərli saymaq olsa da, onun daxili istifadə üçün nəzərdə tutulan əmr, sərəncam və bu kimi sənədləri barədə heç bir bilgi yoxdur.

8. Ümumi dövlət büdcəsinin sahəyə aid hissəsi barədə bölmə ümumiyyətlə yoxdur.

9. Nazirlik tərəfindən təklif edilən xidmətlər barədə də heç bir bilgi verilmir.

10. İşə qəbul qaydaları və bu istiqamət üzrə də hər hansı informasiya yoxdur.

11. Sahə işçilərinin əmək haqları ilə bağlı hər hansı informasiya da gözə dəymir.

12. Vətəndaşların qəbul qaydaları və qəbulu haqqında saytda heç bir bilgi verilmir.

13. Tender və hər cür müsabiqələrlə bağlı da saytda heç bir informasiya yoxdur.

14. Qurumun norma- (qanun)yaratma fəaliyyəti barədə heç nə deyilmir və hər hansı imkan da təklif edilmir.

15. Saytın texniki imkanlarına gəlincə isə demək lazımdır ki, bu da orta səviyyədən də aşağı qiymətləndirilə bilər.