Azərbaycan Respublikası Dövlət Gömrük Komitəsinin www.customs.gov.az domen adlı İnternet saytının fəaliyyətinin təkmilləşdirilməsi ilə bağlı TÖVSİYƏLƏR

Azərbaycan Respublikası Dövlət Gömrük Komitəsinin www.customs.gov.az domen ünvanlı İnternet resursu icmalda da qeyd etdiyimiz kimi inforasiya təminatı  baxımından olduqca kasıb bir resurs təsiri bağışlayır. Saytda ən adi bilgiləri belə tapmaq mümkün deyil. Bundan başqa qurumun rəhbərinin biografiyasının belə verilməməsi olduqca təəccüblü bir hal kimi dəyərləndirilə bilər. Saytdakı çatışmazlıqları nəzərə alaraq aşağıda bəzi tövsiyələrimizi diqqətə çatdırırıq:

1. Qurumun tarixi haqqında dolğun bilgilərin verilməsi olduqca zəruridir. Bundan başqa quruma rəhbərlik edən şəxslər barədə də bilgilərin verilməsi vacibdir.

2. Qurumun yer ünvanını xəritə-sxemi də əlavə edilsə yaxşı olar. Buraya quruma şəhərin müxtəlif istiqamətlərindən gəlmək üçün ictimai nəqliyyat vasitələri haqqında da bilgi vermək məqsədəuyğundur.

3. Dövlət qurumunun ayrı-ayrı struktur bölmələrinin səlahiyyət çərçivələri barədə də bilgilərə zərurət var.

4. Qurumun rəhbər şəxslərinin biografik bilgilərinin sayta əlavə edilməsinə ehtiyac var.

5. Rəhbər şəxslərlə əks əlaqə üçün e-poçt ünvanları və onlayn formanın verilməsi də məqsədəuyğundur.

6. Dövlət qurumunun cari fəaliyyəti ilə bağlı bölmədə qurumdaxili əmr, sərəncam və qərarların əlavə edilməsi zəruridir.

7. Müvafiq qanunun tələblərinə görə, saytda qurumun büdcəsi və onun icra durumu barədə bilgilərin olması da vacibdir.

8. Qurum tərəfindən təklif edilən əlavə xidmətlər və pulsuz mütləq xidmətlər barədə bilgilərin ayrıntılı şəkildə verilməsi vacibdir.

9. Qurumda işə qəbulla bağlı bütün gərəkli bilgilərin sayta əlavə edilməsi qanunun daha bir tələbidir.

10. Sahə işçilərinin əmək haqlarının həddi və onların formalaşması yolları barədə də bilgilər verilməlidir.

11. Vətəndaşların qəbulu ilə bağlı bütün gərəkli bilgilər ayrıca bölmədə sayta əlavə edilərsə faydalı olar.

12. Tender və müsabiqələr barədə bilgilərin verilməsi qanunun daha bir vacib tələbidir.

13. Qurumun norma- (qanun)yaratma fəaliyyəti barədə bilgi çatışmazlığını aradan qaldırmaqla saytdakı daha bir qüsuru ləğv etmək olar.

14. Saytın texniki imkanlarına gəlincə isə onu əlavə edə bilərik ki , istifadəçilərin maraqlarına uyğun olaraq daha da təkmilləşdirilməsi  faydalı olardı.