Azərbaycan Respublikası Ekologiya və Təbii Sərvətlər Nazirliyinin www.eco.gov.az domen adlı İnternet saytının fəaliyyətinin təkmilləşdirilməsi ilə bağlı TÖVSİYƏLƏR

Azərbaycan Respublikası Ekologiya və Təbii Sərvətlər Nazirliyinin www.eco.gov.az domen ünvanlı İnternet saytı monitoring nəticələrindən də göründüyü kimi bir sıra göstəricilərinə görə, yaxşı təsir bağışlayır. Bununla belə saytda bəzi çatışmazlıqlar da nəzərə çarpır. Güman ki, həmin çatışmazlıqlar aradan qaldırılacağı təqdirdə, bu, saytın funksionallığını daha da artırmaqla bərabər ziyarətçilərin işini də asanlaşdırmış olardı. Beləliklə, saytın işinin təkmilləşdirilməsi ilə bağlı tövsiyələrimizi nəzərə çatdırmaq istərdik:

1. Yaxşı olardı ki, saytda nazirliyə qurulduğu andan başçılıq etmiş şəxslər barədə bilgi verilsin. Əgər bu eyni şəxsdirsə, onda ayrıca qeyd olunmasına zərurət var.

2. Ziyarətçilərin nazirliyə gələ bilməsini rahatlaşdırmaq üçün qurumun ünvanının sxemini və ictiami nəqliyyat imkanlarını da təqdim etmək gərəklidir.\\

3. Struktur bölmələrinin ünvanları və onların səlahiyyət hədləri barədə də bilgi verilsəydi işin xeyrinə olardı.

4. Ayrı-ayrı struktur bölmələrinin rəhbərlərinə aid biografik bilgilərin verilməsi daha bir ciddi tələbatın ödənməsinə səbəb olardı.

5. Qurumdaxili əmr və sərəncamları ayrıca təqdim etməklə bərabər onların reestrini də aparmaq lazımdır.

6. Təəssüfləndirici haldır ki, saytda qurumun büdcəsi haqqında bir kəlmə də bilgi yoxdur. Halbuki bu cür bilgilərin verilməsi qanunun tələbləri sırasındadır.

7. Pulsuz mütləq xidmətlərin siyahısı və xidmətlərdən istifadə üsulları haqqında bilgi verməyə ehtiyac var.

8. İşə qəbul qaydaları və boş iş yerləri haqqında bilgilərin olması saytın daha bir qüsurunu aradan qaldırmış olardı.

9. Sahə işçilərinin əmək haqları barədə bilgilərin verilməsi də qanunun daha bir tələbidir.

10. Saytda vətəndaşların qəbulu ilə bağlı bilgilərin olmaması işin zərərinədir. Halbuki bu cür bilgilər ən çox tələb olunanlar sırasındadır.

11. Yaxşı olardı ki, burada nazirliyin keçirdiyi tenderlər barədə də bilgi verilsin.

12. Qurumun norma- (qanun)yaratma fəaliyyəti ilə bilgilərin yoxluğunu da aradan qaldırmağa gərək var.

13. Saytın texniki imkanları zəif sayılmasa da buraya abunə imkanını əlavə etmək vacibdir.